instanewsdesk | प्रकाशित मिति: २०८२ चैत्र २४, मंगलवार १३:१६काठमाडौं । चालु आर्थिक वर्ष २०८२/०८३ को पहिलो ८ महिनामा वाणिज्य बैंकहरूको नाफामा मिश्रित अवस्था देखिएको छ । यस अवधिमा ११ वटा वाणिज्य बैंकको खुद नाफा घट्दा ९ वटा बैंकले भने नाफा वृद्धि गर्न सफल भएका छन् ।
नाफा बढाउने बैंकहरूमा कुमारी बैंक, सिद्धार्थ बैंक, कृषि विकास बैंक, राष्ट्रिय वाणिज्य बैंक, माछापुच्छ्रे बैंक, नबिल बैंक, सानिमा बैंक, नेपाल एसबीआई बैंक र प्राइम कमर्सियल बैंक रहेका छन् । तीमध्ये कुमारी बैंकले सबैभन्दा उच्च २७४.६५ प्रतिशतले नाफा वृद्धि गर्दै अग्रस्थान लिएको छ ।
गत वर्षको ८ महिनामा ९६ करोड ९१ लाख रुपैयाँ खुद नाफा आर्जन गरेको कुमारी बैंकले चालु आवको सोही अवधिमा ३ अर्ब ६३ करोड रुपैयाँ नाफा कमाएको छ । यसैगरी, सिद्धार्थ बैंकको नाफा ६८.३१ प्रतिशतले वृद्धि भएको छ । यस बैंकले गत वर्षको ८ महिनामा १ अर्ब २१ करोड ६९ लाख रुपैयाँ नाफा कमाएको थियो । चालु आवको सोही अवधिमा २ अर्ब ४ करोड ८१ लाख रुपैयाँ कमाएको छ ।
यसैगरी, कृषि विकासको नाफा ६५.५६ प्रतिशतले बढेर १ अर्ब २२ करोड १८ लाख पुगेको छ भने राष्ट्रिय वाणिज्यको ३५.६८ प्रतिशतले बढेर २ अर्ब ३३ करोड ९० लाख पुगेको छ । यसैगरी, माछापुच्छ्रेको नाफा २७.७२ प्रतिशतले बढ्दा नबिलको २६.८७ प्रतिशतले वृद्धि भएको छ । सानिमा, नेपाल एसबीआई र प्राइम कमर्सियलको नाफा क्रमशः २३.२१, १०.८९ र ९.६८ प्रतिशतले बढेको छ ।
ग्लोबल आईएमई बैंक, एनएमबी बैंक, एभरेष्ट बैंक, स्ट्याण्डर्ड चार्टर्ड बैंक, प्रभु बैंंक, हिमालयन बैंक नेपाल इन्भेस्टमेन्ट मेगा बैंक, सिटिजन्स बैंक, नेपाल बैंक, एनआईसी एसिया बैंक र लक्ष्मी सनराइज बैंकको खुद नाफा घटेको छ ।
