तिहारमा दुई दिन मात्रै सुनका असर्फी र चाँदीका मेडालियन बिक्री गर्दै राष्ट्र बैंक

काठमाडौं । नेपाल राष्ट्र बैंकले तिहारलाई लक्षित गर्दै सुनका असर्फी र चाँदीका मेडालियन दुई दिन मात्रै बिक्री गर्ने भएको छ । राष्ट्र बैंकको मुद्रा व्यवस्थापन विभागअन्तर्गतको टक्सार महाशाखाले कात्तिक १९ र २० गते सर्वसाधारणलाई असर्फी तथा मेडालियन बिक्री गर्न लागेको हो ।

राष्ट्र बैंकले कात्तिक १८ गते जारी गरेको सूचनाअनुसार प्रतिव्यक्ति २.५ ग्रामको एक थान सुनको असर्फी र १० ग्रामको एक थान चाँदीको मेडालियन बिक्री गरिनेछ । एक व्यक्तिले बढीमा दुई थान सुनका असर्फी र दुई थान चाँदीका मेडालियन मात्रै किन्न पाउनेछन् ।

सुनको असर्फीमा लक्ष्मी र गणेश अंकित हुनेछन् । चाँदीको मेडालियनमा पनि लक्ष्मी र गणेशको आकृति रहनेछ । तिहारमा धनतेरस तथा लक्ष्मीपूजाका अवसरमा सुनचाँदीका सिक्का किन्ने परम्परालाई ध्यानमा राखेर राष्ट्र बैंकले बिक्री व्यवस्था गरेको हो ।

टक्सार महाशाखा, बबरमहलबाट बिहान ११ बजेदेखि दिउँसो ३ बजेसम्म बिक्री गरिनेछ । बिक्री मौज्दात कायम रहेसम्म मात्रै जारी रहने राष्ट्र बैंकले जनाएको छ । त्यसैले माग बढी भएर मौज्दात सकिएमा तोकिएको समयअघि नै बिक्री बन्द हुन सक्नेछ ।

असर्फी तथा मेडालियन खरिद गर्न नेपाली नागरिकता, राष्ट्रिय परिचयपत्र वा नम्बर उल्लेख भएको अन्य परिचय खुल्ने कागजातको प्रतिलिपिसहित खरिदकर्ता स्वयं उपस्थित हुनुपर्नेछ । खरिदको भुक्तानी नगद वा क्यूआरमार्फत गर्न सकिने व्यवस्था गरिएको छ ।

राष्ट्र बैंकले सुन तथा चाँदीको मूल्य दैनिक रूपमा बिहान करिब ११ बजेपछि निर्धारण गर्ने जनाएको छ । त्यसैले असर्फी र मेडालियनको मूल्य बिक्री हुने दिन मात्रै थाहा हुनेछ । सूचनामा बिक्री मूल्य उल्लेख गरिएको छैन ।

राष्ट्र बैंकले सुन तथा चाँदीका असर्फी, मेडालियन र स्मारिका सिक्का उत्पादन तथा बिक्री गर्दै आएको छ । टक्सार महाशाखा बबरमहलबाट यस्ता सिक्का बिक्री हुने व्यवस्था छ ।