१८ दिनदेखि अवरुद्ध पृथ्वी राजमार्गको कृष्णभीर खण्डमा बिहीबार बिहानदेखि दुईतर्फी यातायात सञ्चालनमा

चितवन — बाढीले सडक बगाएपछि १८ दिनदेखि अवरुद्ध पृथ्वी राजमार्गको कृष्णभीर खण्डमा बिहीबार बिहानदेखि दुईतर्फी यातायात सञ्चालनमा आएको छ। त्रिशूली नदीको कटानबाट सडकको करिब एक सय मिटर भाग भासिएपछि अवरुद्ध बनेको सडकमा नयाँ ट्र्याक निर्माण गरेर यातायात सञ्चालनमा ल्याइएको हो।

भदौ १४ गते बाढीले सडकको तल्लो भाग बगाएपछि कृष्णभीरमा राजमार्ग पूर्ण रूपमा अवरुद्ध भएको थियो। त्यसपछि भदौ १८ गतेदेखि नजिकैको डाँडो काटेर वैकल्पिक ट्र्याक निर्माण थालिएको थियो।

नागढुंगा–मुग्लिन सडक योजना पश्चिम खण्डका इन्जिनियर धीरज ढकालका अनुसार बुधबार साँझसम्म ट्र्याक निर्माण तथा सडक व्यवस्थापनको काम पूरा भएपछि बिहीबार बिहानदेखि नियमित रूपमा दुईतर्फी यातायात सञ्चालन गरिएको हो।

सडक अवरुद्ध भएपछि राजधानीतर्फ जाने ठूला सवारीसाधनलाई समस्या भएको थियो। कृष्णभीरमा यातायात सञ्चालनमा आएपछि नारायणगढ–मुग्लिन सडकखण्डको तुइन खोलामा आंशिक रूपमा रोकिएको सवारी आवागमनसमेत नियमित गरिने भएको छ।

चितवनका प्रमुख जिल्ला अधिकारी गणेश अर्यालका अनुसार कृष्णभीरमा सडक सञ्चालनमा आएपछि तत्कालका लागि तुइन खोलामा आंशिक रूपमा सडक रोकेर गरिएको पहिरो रोकथामको काम रोकिएको छ।

कृष्णभीरको सडक अवरुद्ध हुँदा राजधानीतर्फ ढुवानी हुने एलपी ग्यासलगायत अत्यावश्यक वस्तुको आपूर्तिमा समेत असर परेको थियो। वैकल्पिक मार्गबाट सवारी सञ्चालन गरिए पनि ठूला सवारीसाधनको आवागमन प्रभावित भएको थियो।

भदौ १० गते रसुवाको भोटेकोशीमा आएको बाढीपछि त्रिशूली नदीमा पानीको बहाव बढेको थियो। त्यसपछि भदौ १४ गते आएको अर्को बाढीले कृष्णभीरसहित पृथ्वी राजमार्गका विभिन्न स्थानमा क्षति पुर्‍याएको थियो। अन्य स्थानमा यातायात सञ्चालनमा आए पनि कृष्णभीरमा सडकको ठूलो भाग नै भासिएपछि लामो समय अवरोध भएको हो।

कृष्णभीर हुँदै दैनिक करिब १४ हजार सवारीसाधन आवतजावत गर्ने सडक विभागले जनाएको छ।

सडक विभागका अनुसार अहिले तत्कालका लागि वैकल्पिक ट्र्याकबाट यातायात सञ्चालन गरिएको हो। सडकलाई दीर्घकालीन रूपमा सुरक्षित र व्यवस्थित बनाउन थप प्राविधिक अध्ययन तथा आवश्यक संरचना निर्माणको काम अघि बढाइनेछ।

पृथ्वी राजमार्गको यो खण्डमा यातायात सञ्चालनमा आएपछि काठमाडौं–चितवनलगायत पूर्वी र पश्चिम नेपालबीचको सडक सम्पर्क सहज हुने अपेक्षा गरिएको छ।