instanewsdesk | प्रकाशित मिति: २०८३ श्रावण २९, शुक्रबार १९:२९काठमाडौं, हेटौँडा कपडा उद्योग सञ्चालनमा आएसँगै कपडा उद्योगका लागि आवश्यक कच्चा पदार्थ कपासको स्वदेशी उत्पादन बढाउन उद्योगमन्त्री गौरीकुमारी यादवले निजी क्षेत्रलाई कपास खेतीमा लगानी गर्न आह्वान गरेकी छन्।
नेपालमा कपडा उद्योगका लागि आवश्यक कपास ठूलो मात्रामा आयात गर्नुपर्ने अवस्था अन्त्य गर्दै स्वदेशमै कच्चा पदार्थ उत्पादन र आपूर्ति सुनिश्चित गर्ने उद्देश्यले मन्त्री यादवले व्यवसायी तथा निजी क्षेत्रलाई कपास खेतीतर्फ आकर्षित हुन आग्रह गरेकी हुन्।
मन्त्री यादवले कृषि मन्त्री गीता चौधरीसँग भेट गरी नेपालमा कपास खेती विस्तार गर्ने विषयमा समेत छलफल गरेकी छन्। छलफलका क्रममा कृषि मन्त्री चौधरीले दाङ, बाँके र बर्दियालगायतका जिल्लामा कपास खेतीका लागि उपयुक्त वातावरण रहेको बताइन्।
नेपालमा कपास खेतीको सम्भावना रहे पनि व्यावसायिक रूपमा ठूलो क्षेत्रफलमा खेती हुन नसक्दा कपडा उद्योगका लागि आवश्यक कच्चा पदार्थमा विदेशी बजारमा निर्भर हुनुपर्ने अवस्था छ। सरकारले कपडा उद्योगसँगै कपास उत्पादनलाई प्राथमिकता दिन सके आयात प्रतिस्थापन, रोजगारी सिर्जना र किसानको आम्दानी वृद्धि गर्न सकिने अपेक्षा गरिएको छ।
यसैबीच, लामो समयदेखि बन्द रहेको बुटवल धागो कारखाना पुनः सञ्चालन गर्ने प्रक्रिया पनि अघि बढेको उद्योग विभागका महानिर्देशक जितेन्द्र बस्नेतले जानकारी दिए। उनका अनुसार कारखाना सञ्चालनका लागि आवश्यक सम्पत्ति तथा दायित्वको मूल्यांकनको काम अन्तिम चरणमा पुगेको छ।
हेटौँडा कपडा उद्योग सञ्चालनमा आएपछि आवश्यक कच्चा पदार्थ स्वदेशमै उत्पादन गर्ने र बुटवल धागो कारखानालाई समेत पुनः सञ्चालनमा ल्याउने सरकारको तयारीले नेपालमा कपासदेखि धागो हुँदै कपडासम्मको उत्पादन शृंखला विकास गर्ने सम्भावना बढाएको छ।
मन्त्री यादवले स्वदेशी उद्योगलाई आवश्यक पर्ने कच्चा पदार्थ नेपालमै उत्पादन गर्न निजी क्षेत्रलाई प्रोत्साहन गर्ने बताउँदै आएकी छन्। कपास खेती विस्तारमार्फत विदेशी कपासको आयात घटाउने, स्वदेशी उत्पादन बढाउने र रोजगारीका अवसर सिर्जना गर्ने सरकारको लक्ष्य रहेको बताइएको छ।
