instanewsdesk | प्रकाशित मिति: २०८२ आश्विन ३१, शुक्रबार १८:१८काठमाडौं – नेपाल राष्ट्र बैंकले वाणिज्य बैंक, विकास बैंक, वित्त कम्पनी र पूर्वाधार विकास बैंकलाई वित्तीय विवरण सार्वजनिक गर्ने समयसीमा केहि खुकुलो बनाएको छ। पहिले त्रैमास अन्त्य भएको १५ दिनभित्र विवरण प्रकाशित गर्नुपर्ने व्यवस्था थियो। यस पटक केन्द्रीय बैंकले उक्त समयसीमा हेरफेर (reschedule) गर्दै कात्तिक २१ गतेसम्म म्याद बढाएको छ।
यसबाहेक, राष्ट्र बैंकले आर्थिक वर्ष २०८२/८३ को पहिलो त्रैमासका लागि नयाँ निर्देशन पनि दिएको छ। कात्तिक १५ गतेसम्म प्राप्त भएको ब्याजबाहेक, अझै असुल हुन बाँकी ब्याज आम्दानी बराबरको रकम नियमनकारी कोषमा जम्मा गर्नुपर्ने व्यवस्था गरिएको छ। यो सुविधा बैंक तथा वित्तीय संस्था मात्र होइन, पूर्वाधार विकास बैंकहरूमा पनि लागू हुनेछ।
त्यसका लागि आयकर, कर्मचारी बोनस र वैधानिक कोष (जस्तै साधारण जगेडा कोष तथा संस्थागत सामाजिक उत्तरदायित्व कोष) मा पहिले नै जम्मा गरेको रकम कटाएर बाँकी रकम सञ्चित मुनाफाबाट खर्च गरी नियमनकारी कोषमा राख्न भनिएको छ।
