सडक अवरुद्ध भए पनि इन्धन आपूर्ति निरन्तर, उद्धारका हेलिकप्टरलाई १ लाख २० हजार लिटर हवाई इन्धन र बाढीपीडितलाई ५७५ ग्यास सिलिन्डर

काठमाडौँ — भोटेकोशी बाढीपछि मुख्य सडकमार्ग अवरुद्ध हुँदा समेत नेपाल आयल निगमले पेट्रोलियम पदार्थ र एलपी ग्यासको आपूर्ति वैकल्पिक मार्गबाट निरन्तर राखेको छ । उद्धार तथा राहत कार्यका लागि आवश्यक हवाई इन्धनको आपूर्ति पनि निगमले प्राथमिकतामा राखेको जनाएको छ ।

भदौ १० गते भोटेकोशी नदीमा आएको बाढीले रसुवा, नुवाकोट, धादिङ, गोरखा र चितवनलगायत जिल्लामा ठूलो जनधनको क्षति भएपछि प्रभावित क्षेत्रमा उद्धार तथा राहतका लागि पेट्रोलियम पदार्थ आवश्यक परेको थियो । त्यही समयमा भदौ १४ गते त्रिशूली नदीले पृथ्वी राजमार्गअन्तर्गत धादिङको कृष्णभीर खण्ड कटान गरेपछि काठमाडौं आउने मुख्य सडकमार्गसमेत अवरुद्ध भयो ।

कृष्णभीर खण्डमा सडक भासिएपछि पेट्रोलियम ट्यांकर र ग्यास बुलेट नियमित मार्गबाट काठमाडौं आउन नसक्ने अवस्था बनेको थियो । त्यसपछि निगमले त्रिभुवन राजपथ अर्थात् बाइरोडको बाटो प्रयोग गरेर काठमाडौं उपत्यका तथा आसपासका जिल्लामा पेट्रोलियम पदार्थ र एलपी ग्यास ल्याउने व्यवस्था मिलाएको हो ।

दुई दिनमा ५८ हजारभन्दा बढी ग्यास सिलिन्डर

ग्यासको नियमित आपूर्ति कायम राख्न निगमले तराईका ग्यास उद्योगबाट सिलिन्डर भरेर वैकल्पिक मार्ग हुँदै काठमाडौं ल्याउने व्यवस्था गरेको छ ।

निगमका अनुसार भदौ १८ गते काठमाडौं उपत्यकाका लागि विभिन्न ब्रान्डका करिब २४ हजार ५०० सिलिन्डर ल्याउने व्यवस्था गरिएको थियो । त्यसको भोलिपल्ट अर्थात् भदौ १९ गते करिब ३४ हजार १३४ सिलिन्डर ल्याउने व्यवस्था गरिएको थियो ।

यसरी दुई दिनमा मात्रै करिब ५८ हजार ६३४ ग्यास सिलिन्डर उपत्यकामा ल्याउने व्यवस्था गरिएको हो ।

ग्यासको आपूर्ति थप सहज बनाउन उद्योगहरूलाई सार्वजनिक बिदाका दिनमा समेत सिलिन्डर भर्ने काम गर्न निर्देशन दिइएको निगमले जनाएको छ । उपलब्ध ढुवानी साधनको अधिकतम प्रयोग गरी वैकल्पिक मार्गबाट ग्यास ल्याउन पनि उद्योगहरूलाई भनिएको छ ।

यसअघि नै कृष्णभीरमा सडक अवरुद्ध भएपछि निगमले घरायसी उपभोक्तालाई प्राथमिकता दिन आग्रह गरेको थियो ।

उद्धारका हेलिकप्टरलाई १ लाख २० हजार लिटर हवाई इन्धन

निगमले सडकमार्गबाट इन्धन र ग्यास आपूर्ति मात्र गरेको छैन, बाढी प्रभावित क्षेत्रमा उद्धारका लागि प्रयोग भइरहेका हेलिकप्टरलाई आवश्यक हवाई इन्धनको व्यवस्था पनि गरेको छ ।

नेपाली सेनासँगको समन्वयमा नुवाकोटस्थित सेनाको ब्यारेकबाट हेलिकप्टरमा हवाई इन्धन भर्ने व्यवस्था गरिएको निगमले जनाएको छ । भदौ १० गतेदेखि हालसम्म त्यहाँबाट रिफ्युलिङका लागि १ लाख २० हजार लिटर हवाई इन्धन पठाइसकिएको छ ।

नुवाकोटस्थित सेनाको ब्यारेकबाट हाल पनि हेलिकप्टरमा हवाई इन्धन भर्ने काम नियमित रूपमा भइरहेको निगमले जनाएको छ ।

यसअघि बाढीपछिको प्रारम्भिक उद्धार चरणमा निगमले ४० हजार ८४० लिटर हवाई इन्धन उपलब्ध गराएको विवरण सार्वजनिक भएको थियो ।

बाढीपीडितका लागि ५७५ ग्यास सिलिन्डर

उद्धार गरेर प्रभावित क्षेत्रका विभिन्न सेल्टरमा राखिएका नागरिकका लागि खाना पकाउने ग्यासको व्यवस्थासमेत गरिएको छ ।

नेपाल एलपी ग्यास उद्योग संघले बाढी प्रभावितका लागि १ हजार २५० भरिएका ग्यास सिलिन्डर उपलब्ध गराउने प्रतिबद्धता जनाएको थियो ।

त्यसमध्ये राष्ट्रिय विपद् जोखिम न्यूनीकरण तथा व्यवस्थापन प्राधिकरणको अनुरोधमा रसुवा र नुवाकोटका प्रभावित क्षेत्रमा हालसम्म ५७५ सिलिन्डर पठाउने व्यवस्था मिलाइएको निगमले जनाएको छ ।

बाढीका कारण सडक, पुल तथा यातायात संरचनामा क्षति पुगेपछि प्रभावित क्षेत्रमा राहत सामग्री पुर्‍याउनसमेत कठिनाइ भइरहेको छ । यस्तो अवस्थामा ग्यास उद्योग, निगम र सम्बन्धित सरकारी निकायबीच समन्वय गरेर प्रभावित क्षेत्रमा आवश्यक ग्यास पुर्‍याउने व्यवस्था गरिएको हो ।

वैकल्पिक मार्गमै निर्भर आपूर्ति

कृष्णभीरको सडक तत्काल पूर्ण रूपमा सञ्चालनमा आउन नसकेसम्म काठमाडौं उपत्यकाको पेट्रोलियम तथा ग्यास आपूर्ति वैकल्पिक मार्गमै निर्भर रहने अवस्था छ । त्यसैले निगमले तराईका उद्योगबाट ग्यास भरेर बाइरोड हुँदै उपत्यकामा ल्याउने व्यवस्था गरेको हो ।

पेट्रोलियम पदार्थको हकमा पनि ट्यांकरलाई स्थानीय प्रशासनसँगको समन्वयमा वैकल्पिक मार्गबाट काठमाडौं ल्याउने व्यवस्था गरिएको छ । यसले मुख्य आपूर्ति मार्ग अवरुद्ध भए पनि उपत्यकामा पेट्रोलियम पदार्थ र खाना पकाउने ग्यासको आपूर्ति पूर्ण रूपमा रोकिन नदिने प्रयास भइरहेको देखाउँछ ।

भोटेकोशी बाढीपछि एकातिर प्रभावित जिल्लामा उद्धार तथा राहतका लागि इन्धन आवश्यक परेको छ भने अर्कोतर्फ कृष्णभीरमा सडक अवरुद्ध हुँदा काठमाडौं उपत्यकाको नियमित आपूर्ति प्रणालीमै दबाब परेको छ । यही अवस्थालाई व्यवस्थापन गर्न निगमले उद्धारका लागि हवाई इन्धन र उपत्यकाका लागि ग्यास तथा पेट्रोलियम पदार्थको आपूर्ति एकैसाथ अघि बढाएको जनाएको छ ।