अन्तर्राष्ट्रिय सम्मेलन देशको नीति निर्माण र विद्यार्थीको भविष्यलाई सहयोगी बन्नेछ : डा.घनश्यामप्रसाद साह

काठमाडौं । मेगा कलेजका प्राचार्य एवम प्रमुख डा.घनश्यामप्रसाद साहले अध्ययन–अनुसन्धान, कानुन तथा कर (ट्याक्स) सम्बन्धी विषयलाई केन्द्रमा राखेर अन्तर्राष्ट्रिय सम्मेलन आयोजना गर्न लागेको बताएका छन् । उनले डिजिटल अर्थतन्त्र र दिगो विकासलाई पनि प्राथमिकता दिएको प्रष्ट पारे ।

डा. साहले सम्मेलन आगामी जेठ १ र २ गते कलेज परिसरमा अन्तर्राष्ट्रिय सम्मेलन आयोजना हुने जानकारी लिए । सम्मेलनमार्फत आएको निष्कर्षले मुलुकको नीति निर्माणमा सहयोग पुग्न विश्वास व्यक्त गरे ।

उनले भने, ‘अन्तर्राष्ट्रिय सम्मेलनका लागि कानुन तथा ट्याक्ससँग सम्बन्धित इस्यूज तथा रिसर्चहरु गरेको छौं । सार्क राष्ट्रका जतिपनि प्रोफेसर, अध्ययन वा अनुसन्धानकर्ताहरूलाई एकै पटक बोलाएर सम्मेलन गर्न लागे हौं । उहाँहरुले गर्नुभएको अनुसन्धानहरु हाम्रा लागि उपयोगी हुनेछन् ।’

त्यस्ता अनुसन्धानले सरकारका कमीकमजोरी औंल्याउने र नीति निर्माणमा सुधार गरेर लैजान प्रेरित गर्ने अपेक्षा गरिएको उनले बताए ।

उनका अनुसार मेगा कलेजमा पढ्ने विद्यार्थीहरु एजुकेशनमा मात्र नभइ एजुकेशनलाई मार्केटसँग जोड्नुपर्छ र त्यसमा अनुसन्धानले ठूलो भूमिका खेल्नेछ ।

सम्मेलनमा नेपालकै अनुसन्धानकर्ता, भारतका धेरैजसो विश्वविद्यालयका अनुसन्धानकर्ता, सार्क देशका अनुसन्धानकर्ताहरुको उपस्थिति रहने जानकारी दिए ।

उनका अनुसार सम्मेलनले विद्यार्थीहरुलाई प्रतिस्पर्धी बनाउनु, बजारमा राम्रो जागिर पाउनु र उद्यमशिलता गराउन प्रेरित गर्नेछ ।
उनले भने ‘यसअघि भएको अन्तर्राष्ट्रिय सम्मेलनले मार्केटमा विद्यार्थीहरुले राम्रो अवसर पाएका थिए ।’ आफ्ना कलेजका विद्यार्थीहरु राष्ट्रिय वा अन्तर्राष्ट्रिय बजारमा फिट गराउनका लागि पनि सम्मेलनको आवश्यक्ता भएको उनको भनाइ थियो ।

सम्मेलनले नीति निर्माणमा सहयोग पुग्नुे, अर्थतन्त्रमा टेवा पुग्ने र दिगो विकासमा सहयोग पुर्याउने विश्वास उनले व्यक्त गरे । उनले सम्मेलनका लागि अनुमानित ५ देखि १० लाख रुपैयाँ बजेट लाग्ने र सम्पूर्ण खर्च कलेजले नै व्यवस्थापन गर्ने जानकारी दिए ।
सम्मेलनमा विभिन्न सेसनहरु हुने र त्रिभुवन विश्वविद्यालय व्यवस्थापन संकायका डा.डिल्लीराज शर्माले प्रमुख आथित्यता ग्रहण गर्नेछन् । कलेजले समकालीन वाणिज्यका मुद्दाहरुसँग सम्बन्धित दोस्रो अन्तर्राष्ट्रिय सम्मेलन गर्न लागेको हो ।

नेपाल कमर्श एसोसिएसनसँगको सहकार्यमा मेगा कलेजले सम्मेलन गर्न लागेको हो । सम्मेलनमा नवप्रवर्तन, दिगोपन र विश्वव्यापी प्रतिस्पर्धासँग जोडिएका विषयमा विज्ञहरुले प्रवचन तथा प्रस्तुति दिनेछन् ।

सम्मेलनमा नेपाल र भारतसहित विभिन्न देशका प्राध्यापक, व्यवस्थापनविद्, नीति निर्माता तथा विद्यार्थीहरुको सहभागिता रहनेछ । सम्मेलनमा तीव्र गतिमा परिवर्तन भइरहेको विश्व अर्थतन्त्र, प्रविधिको विकास, दिगो विकासको आवश्यकता र अन्तर्राष्ट्रिय प्रतिस्पर्धाको सन्दर्भमा व्यापार तथा व्यवस्थापन क्षेत्रले भोगिरहेका चुनौती र सम्भावनाबारे गहिरो विमर्श हुनेछ ।

सम्मेलन मुख्यतः उद्योग, व्यापार, वाणिज्यजस्ता क्षेत्रमा विश्वभर चलेको ट्रेन्डको अध्ययन गर्न, नेपालजस्तो देशले लिनुपर्ने नीतिको फ्रेमवर्क तयार पार्न तथा अनुसन्धानकर्ताहरुको ज्ञानका दृष्टिले निकै महत्वपूर्ण मानिएको छ ।

यसअघि मेगा कलेज कुमारीपाटीले सन् २०१९ मा पनि व्यवस्थापनसम्बन्धी अन्तर्राष्ट्रिय सम्मेलन आयोजना गरेको थियो ।
यसपटक सम्मेलनअन्तर्गत रणनीतिक व्यवस्थापन र नेतृत्व, डिजिटल रूपान्तरण तथा नवप्रवर्तन, बजार व्यवस्थापन र उपभोक्ता व्यवहार, वित्त तथा दिगोपन, उद्यमशीलता र साना तथा मझौला उद्योग, मानव संसाधन व्यवस्थापन, अन्तर्राष्ट्रिय व्यापार तथा आर्थिक नीति, हरित अर्थतन्त्र र जिम्मेवार व्यवसाय, साथै कर तथा कानुनी पक्षजस्ता विविध विषयमा शोत्रपत्र र कार्यपत्रहरु प्रस्तुत एवं छलफल हुनेछ ।

सम्मेलनबाट विशेषगरी अनुसन्धानकर्ता, प्राध्यापक, उद्योगी–व्यवसायी, नीति निर्माता तथा स्नातकोत्तर तहका विद्यार्थीहरू लाभान्वित हुने अपेक्षा गरिएको छ ।

पार्वती भण्डारी, नेपाल न्यूज बैंक