instanewsdesk | प्रकाशित मिति: २०८२ असार १९, बिहीबार ११:०८नेपालगञ्ज — कर्णाली डेभलपमेन्ट बैंकमा देखिएको करोडौँको आर्थिक अनियमितता प्रकरणमा बैंकका पूर्वअध्यक्ष पशुपति दयाल मिश्र पक्राउ परेका छन्। नेपालगञ्जबाट पक्राउ गरिएका मिश्र लामो समयदेखि फरार थिए।
प्रहरीका अनुसार उनी बैंक घोटालासँग जोडिएका प्रमुख अभियुक्तमध्ये एक हुन्। पछिल्ला दिनमा निगरानीमा रहेका मिश्रलाई नियन्त्रणमा लिनु घोटालासँग सम्बन्धित पछिल्लो महत्वपूर्ण गिरफ्तारी हो। यसअघि बैंकका तत्कालीन वित्त प्रमुख र संस्थापक अध्यक्ष पनि पक्राउ परिसकेका छन्।
मधेश आन्दोलनको पृष्ठभूमिबाट राजनीतिक यात्रा सुरु गरेका मिश्र २०७४ सालको प्रतिनिधिसभा निर्वाचनमा एमालेको समर्थनमा उम्मेदवार बनेका थिए। उनी हाल नेकपा (एमाले) का केन्द्रीय सदस्य छन्।
नेपाल राष्ट्र बैंकको निर्देशनमा अगाडि बढाइएको अनुसन्धानमा हाल एक टोली बाँकेमा खटिएको छ। राष्ट्र बैंकले आन्तरिक छानबिन प्रतिवेदनका आधारमा कर्णाली डेभलपमेन्ट बैंकलाई समस्याग्रस्त बैंकको सूचीमा राख्दै प्रत्यक्ष हस्तक्षेप गरेको थियो।
प्रहरीले हालसम्म झण्डै २ अर्ब ५० करोड रुपैयाँ बराबरको रकम दुरुपयोग भएको आशंका जनाएको छ। घटनामा बैंकिङ कसुर तथा सजायसम्बन्धी ऐन अन्तर्गत अनुसन्धान अघि बढिरहेको छ।
