यातायात व्यवसायीको आन्दोलनपछि गण्डकीमा राइड सेयरिङ नियमावली एक महिनाका लागि स्थगित

काठमाडौं । यातायात व्यवसायीहरूसँग भएको सहमतिपछि गण्डकी प्रदेश सरकारले ‘राइड सेयरिङ (नियमन र व्यवस्थापन) नियमावली २०८२’ एक महिनाका लागि स्थगित गर्ने निर्णय गरेको छ।

सोमबार मध्यरातिमा सरकार र व्यवसायीबीच सहमति भएपछि आज साँझ मुख्यमन्त्री कार्यालयमा बसेको बैठकले नियमावली स्थगित गर्ने निर्णय गरेको हो। बैठकमा मुख्यमन्त्रीसहित सरोकार मन्त्रीहरूको उपस्थिति थियो।

सर्वोच्च अदालतले गत असार १३ गते राइड सेयरिङ सेवालाई व्यवस्थित गर्न सरकारलाई आदेश दिएको थियो। अदालतले कानुनी आधार अभाव भन्दै यस्तो सेवा सञ्चालनमा अवरोध नगर्न निर्देशन दिएको थियो।

यसै आदेशअनुसार गण्डकी प्रदेश सरकारले जेठ १ गतेदेखि नियमावली लागू गरेको थियो। तर, सो निर्णयपछि असन्तुष्टि जनाउँदै यातायात व्यवसायीहरू आन्दोलनमा उत्रिएका थिए। उनीहरूले सार्वजनिक यातायात सञ्चालन ठप्प पार्दै सिण्डिकेट तोडिन सक्ने चिन्ता व्यक्त गरेका थिए।

हाल सार्वजनिक सवारी साधन सञ्चालन प्रभावित भइरहेका बेला, गण्डकी सरकारले लचकता देखाउँदै नियमावली एक महिनाका लागि स्थगन गरेको हो, जसबाट सहमति कार्यान्वयनमा आएको संकेत गरिएको छ।