सरकारले मुख्यसचिवमा एकनारायण अर्याल नियुक्त गर्ने निर्णय गरेको छ ।
आज बसेको मन्त्रिपरिषद्को बैठकले गृह सचिव रहेका अर्याललाई भदौ १६ गतेदेखि लागू हुने गरी मुख्यसचिवमा नियुक्त गरेको सञ्चार तथा सूचना प्रविधि तथा सरकारका प्रवक्ता पृथ्वीसुब्बा गुरुङले जानकारी दिए ।
हालकी मुख्यसचिव लीलादेवी गड्तौला शनिवारदेखि अनिवार्य अवकाशमा जाँदैछिन् । यसअघिका मुख्यसचिव डा. बैकुण्ठ अर्यालविरुद्ध भ्रष्ट्राचार मुद्दा परेपछि निलम्बरमा परेसँगै गड्तौलालाई मुख्यसचिवको जिम्मेवारी दिइएको थियो । गड्तौला नेपालको इतिहासमा पहिलो महिला मुख्यसचिव हुन् ।
त्यस्तै आज बसेको बैठकले चलचित्र विकास बोर्डको कार्यकारी अध्यक्षमा दिनेश डिसीलाई नियुक्त गर्ने निर्णय गरेको छ ।
त्यसैगरी दूरसञ्चार सेवा प्रदायक टेलिकम कम्पनी एनसेललाई अनुमति पत्र नवीकरण शुल्क चार किस्तामा बुझाउन दिने निर्णय गरेको छ ।
‘एनसेललाई अनुमति पत्र नवीकरण वापतको शुल्क चार किस्तामा बुझाउन दिने निर्णय भएको छ,’ उनले भने, ‘दोस्रो किस्तादेखि अन्तिम किस्तासम्म बाँकी रहेको रकममा १० प्रतिशत ब्याजदर पनि बुझाउनुपर्नेछ ।’



