अनाक क्राकाताउ ज्वालामुखी विस्फोटपछि जकार्ताका २०९ उडान प्रभावित, २२ हजार ८०० यात्रु समस्यामा

अनाक क्राकाताउ विस्फोटपछि जकार्ताका २०९ उडान प्रभावित, २२ हजार ८०० यात्रु समस्यामा

काठमाडौं — इन्डोनेसियाको अनाक क्राकाताउ ज्वालामुखी विस्फोटपछि निस्किएको ज्वालामुखीय खरानीका कारण जकार्तास्थित सोकार्नो–हाट्टा अन्तर्राष्ट्रिय विमानस्थलको उडान सेवा प्रभावित भएको छ। विमानस्थलमा उडान सञ्चालन अस्थायी रूपमा रोकिँदा २०९ उडान प्रभावित भएका छन् भने करिब २२ हजार ८०० यात्रु समस्यामा परेका छन्।

इन्डोनेसियाको सुन्डा जलसन्धिमा रहेको अनाक क्राकाताउमा आइतबार बिहान ३ः५३ बजे करिब ३० सेकेन्डसम्म ठूलो विस्फोट भएको थियो। विस्फोटपछि ज्वालामुखीबाट लाभाको ज्वालासहित ठूलो मात्रामा खरानी निस्किएको थियो।

ज्वालामुखीय खरानी हवाई क्षेत्रमा फैलिएपछि सोकार्नो–हाट्टा विमानस्थलले बिहान ५ः३० बजेदेखि ९ः३० बजेसम्म उडान सेवा अस्थायी रूपमा बन्द गरेको थियो। उडान रद्द तथा ढिलाइ हुँदा विमानस्थलमा यात्रुको चाप बढेको थियो।

प्रभावित उडानमा इन्डोनेसियाका विभिन्न गन्तव्यतर्फका आन्तरिक उडानसँगै सिङ्गापुर, हङकङ, सिड्नी, एम्स्टर्डम, सोल, दोहा र क्वालालम्पुर जाने अन्तर्राष्ट्रिय उडानसमेत छन्। केही उडान रद्द भएका छन् भने केहीको समय परिवर्तन तथा अन्य विमानस्थलतर्फ डाइभर्ट गरिएको छ।

विमानस्थलमा रातभर पार्क गरिएका करिब १७० विमानसमेत एप्रोनमै रोकिएका थिए। नागरिक उड्डयन अधिकारीहरूले विमानस्थल, एयरलाइन्स, हवाई नेभिगेसन सेवा तथा मौसम विज्ञान निकायसँग समन्वय गरेर अवस्थाको निगरानी गरिरहेका छन्। यात्रुलाई विमानस्थल जानुअघि सम्बन्धित एयरलाइन्ससँग उडानको पछिल्लो अवस्था बुझ्न आग्रह गरिएको छ।

५० हजार फिटसम्म फैलियो खरानी

ज्वालामुखीबाट निस्किएको खरानीका दुईवटा बादल पहिचान भएका छन्। एउटा करिब २० हजार फिट र अर्को ५० हजार फिटसम्मको उचाइमा पुगेको अधिकारीहरूले बताएका छन्।

खरानी जकार्ता, बान्टेन, पश्चिम जाभा, लाम्पुङलगायत क्षेत्रमा फैलिएको छ। विमानको इन्जिनमा ज्वालामुखीय खरानी प्रवेश गर्दा गम्भीर जोखिम हुने भएकाले हवाई उडानमा विशेष सावधानी अपनाइएको हो।

ज्वालामुखीको गतिविधिका कारण केही विद्यालयका गतिविधि रोकिएका छन् भने स्थानीय माछा मार्ने गतिविधिसमेत प्रभावित भएको छ। सर्वसाधारणलाई खरानी परेको अवस्थामा घरभित्र रहन, मास्क तथा आँखाको सुरक्षा प्रयोग गर्न र बाहिरी गतिविधि कम गर्न आग्रह गरिएको छ।

तत्काल सुनामीको जोखिम छैन

विस्फोटबाट हालसम्म मानवीय क्षति भएको विवरण आएको छैन। स्थानीय बासिन्दा तथा पर्यटकलाई ज्वालामुखीको सक्रिय क्रेटरबाट कम्तीमा तीन किलोमिटर टाढा रहन चेतावनी दिइएको छ।

इन्डोनेसियाली विपद् व्यवस्थापन अधिकारीहरूले तत्काल सुनामीको जोखिम नरहेको बताएका छन्। अनाक क्राकाताउ हाल चार तहको चेतावनी प्रणालीमध्ये दोस्रो उच्च सतर्कता तहमा रहेको छ।

सन् २०१८ मा अनाक क्राकाताउको गतिविधिपछि आएको पानीमुनिको पहिरोले सुनामी निम्त्याउँदा जाभा र सुमात्रामा ४३० भन्दा बढी मानिसको मृत्यु भएको थियो।

अनाक क्राकाताउ सन् १८८३ को विनाशकारी क्राकाताउ विस्फोटपछि बनेको ज्वालामुखी टापु हो। यसको नामको अर्थ ‘क्राकाताउको सन्तान’ हो। इन्डोनेसिया प्रशान्त महासागरको ‘रिङ अफ फायर’ क्षेत्रमा पर्ने भएकाले यहाँ ज्वालामुखी र भूकम्पीय गतिविधि नियमित हुने गर्छ।