instanewsdesk | प्रकाशित मिति: २०८३ भाद्र १५, सोमबार १५:५३काठमाडौं, १५ भदौः प्रधानमन्त्री वालेन्द्र शाह र सत्तारुढ राष्ट्रिय स्वतन्त्र पार्टी (रास्वपा)का सभापति रवि लामिछानेबीच भेटवार्ता भएको छ। प्रधानमन्त्री तथा मन्त्रिपरिषद्को कार्यालय, सिंहदरबारमा सोमबार भएको भेटमा रसुवाको भोटेकोशी बाढीबाट प्रभावित क्षेत्रमा भइरहेका खोज, उद्धार तथा राहतका विषयमा छलफल भएको हो।
भेटमा बाढी प्रभावित नागरिकको उद्धार, राहत वितरण तथा नागरिक व्यवस्थापनका साथै क्षति पुगेका संरचनाको पुनःस्थापनाका विषयमा छलफल भएको प्रधानमन्त्रीको सचिवालयले जनाएको छ।
प्रधानमन्त्री शाहले विपद् प्रभावित क्षेत्रमा नागरिकको जीउधनको रक्षा, राहत सामग्रीको सहज पहुँच तथा पुनःस्थापनाका लागि सरकारी संयन्त्र पूर्ण क्षमताका साथ परिचालन गरिएको जानकारी दिए।
भोटेकोशी बाढीबाट रसुवासहित आसपासका जिल्लामा ठूलो क्षति पुगेपछि सरकारले खोज तथा उद्धार, राहत वितरण र प्रभावित नागरिकको व्यवस्थापनलाई प्राथमिकताका साथ अघि बढाइरहेको छ। जलविद्युत् आयोजना, सडक तथा अन्य पूर्वाधारमा समेत क्षति पुगेकाले तत्कालीन राहतसँगै पुनःस्थापनाको कामलाई पनि अघि बढाउनुपर्ने अवस्था रहेको छ।
