instanewsdesk | प्रकाशित मिति: २०८३ श्रावण ११, सोमबार ०९:२८काठमाडौं । देशको विद्युत् प्रणालीले आन्तरिक उत्पादनबाटै माग धान्दै अतिरिक्त ऊर्जा भारततर्फ निर्यात गरिरहेको छ । नेपाल प्राधिकरणका अनुसार हाल साँझको सर्वाधिक माग (पिक आवर) ३ हजार २४८ मेगावाट पुगेको छ भने दैनिक कुल ऊर्जा माग ७३ हजार ६२९ मेगावाट घण्टा रहेको छ ।
यस अवधिमा भारतबाट कुनै पनि विद्युत् आयात गर्न नपरेको र उल्टै २२ हजार १०२ मेगावाट घण्टा बराबरको बिजुली निर्यात भइरहेको प्राधिकरणले जनाएको छ । बिजुली उत्पादनतर्फ निजी क्षेत्रको योगदान सबैभन्दा ठूलो छ ।
प्राधिकरणको विद्युत् प्रणालीमा निजी ऊर्जा उत्पादकहरूले ४७ हजार ५६३ मेगावाट घण्टा बराबर ऊर्जा आपूर्ति गरिरहेका छन् । प्राधिकरणका आफ्नै आयोजनाबाट ८ हजार ९५९ मेगावाट घण्टा र सहायक कम्पनीमार्फत १७ हजार १०८ मेगावाट घण्टा बराबर विद्युत् उत्पादन भइरहेको छ ।
यसैबीच, मनसुन सुरु भएयता वर्षाका कारण देशको कुनै पनि क्षेत्रमा विद्युत् आपूर्ति अवरुद्ध नभएको प्राधिकरणले जनाएको छ । सम्भावित अवरोधलाई तत्काल समाधान गर्न सातै प्रदेशका कार्यालय तथा काठमाडौंमा प्राविधिक मर्मत टोली चौबीसै घण्टा तयारी अवस्थामा राखिएको प्राधिकरणको भनाइ छ ।
पछिल्ला वर्षमा उत्पादन क्षमता विस्तार, निजी क्षेत्रको बढ्दो सहभागिता र प्रसारण प्रणालीमा सुधारका कारण नेपाल विद्युत् क्षेत्रमा आत्मनिर्भर बन्दै गएको संकेत यी तथ्यांकले देखाएका छन् ।
