नेपाल–दक्षिण कोरिया सहकार्य विस्तार गर्न कोरियन चेम्बर र वल्र्ड दागाचीबीच सम्झौता

काठमाडौं । नेपाल र दक्षिण कोरियाबीच व्यापार, पर्यटन, शिक्षा तथा डिजिटल सहकार्य विस्तार गर्ने उद्देश्यसहित कोरियन चेम्बर अफ कमर्स इन नेपाल र वल्र्ड दागाची बीच समझदारीपत्र (एमओयू) मा हस्ताक्षर भएको छ । काठमाडौंमा आयोजित भेटघाट तथा अनुभव आदान–प्रदान कार्यक्रममा कोरियन चेम्बर अफ कमर्स इन नेपालका अध्यक्ष इओम जिन योङ र वल्र्ड दागाचीका उपाध्यक्ष किम साङ ह्युन ले उक्त समझदारीपत्रमा हस्ताक्षर गरेका हुन् ।

समझदारीअनुसार नेपाल र दक्षिण कोरियाबीच व्यावसायिक सञ्जाल विस्तार, डिजिटल सूचना आदान–प्रदान, पर्यटन प्रवद्र्धन, शिक्षा, मानवस्रोत विकास तथा भाषा सेवाका क्षेत्रमा संयुक्त सहकार्य गरिने जनाइएको छ । दक्षिण कोरियाको बुसानमा मुख्य कार्यालय रहेको वल्र्ड दागाची बहुभाषिक सञ्चार मञ्चका रूपमा परिचित छ । यसले विभिन्न देशका नागरिक, व्यवसायी तथा संस्थालाई डिजिटल माध्यममार्फत जोड्ने काम गर्दै आएको जनाएको छ ।

कार्यक्रमलाई सम्बोधन गर्दै उपाध्यक्ष किम साङ ह्युनले नेपाल र दक्षिण कोरियाबीचको सम्बन्धलाई अझ सुदृढ बनाउन डिजिटल मञ्चको महत्वपूर्ण भूमिका रहने बताए । उनले दागाची केवल एउटा एप नभई भाषा र संस्कृतिबीचको दूरी घटाउने विश्वव्यापी सञ्चार मञ्च भएको उल्लेख गरे । ‘यो केवल औपचारिक कार्यक्रम होइन, नेपाल र कोरियाले सँगै उज्ज्वल भविष्य निर्माण गर्ने नयाँ सुरुवात हो,’ उनले भने । साथै नेपाललाई ‘फेरि आउन मन लाग्ने देश’ का रूपमा विश्वसामु चिनाउन दागाचीले सहकार्य गर्ने प्रतिबद्धता व्यक्त गरे ।

कार्यक्रममा नेपालका लागि दागाची प्रतिनिधि माधव सापकोटाले नेपाली व्यवसायलाई स्थानीय स्तरबाट अन्तर्राष्ट्रिय बजारसम्म पु¥याउने लक्ष्यसहित मञ्च अघि बढिरहेको जानकारी दिए । उनका अनुसार पर्यटन, होमस्टे, शैक्षिक परामर्श, मानवस्रोत तथा स्थानीय उत्पादनलाई अन्तर्राष्ट्रिय बजारमा पहुँच विस्तार गर्न दागाची प्रभावकारी माध्यम बन्न सक्छ ।

सापकोटाले दागाचीमा रहेको ‘प्रमाणित प्रोफाइल’ प्रणालीका कारण व्यवसायप्रति विश्वास बढ्ने, विदेशी ग्राहकसँग प्रत्यक्ष सम्पर्क सहज हुने तथा कृत्रिम बुद्धिमत्तामा आधारित बहुभाषिक सेवाले भाषागत समस्या समाधान गर्ने बताए । उनले कोरियाली विश्वविद्यालय, छात्रवृत्ति, रोजगारीका अवसर तथा अन्तर्राष्ट्रिय सञ्जाल विस्तारमा दागाची उपयोगी बन्ने उल्लेख गर्दै नेपाल–दक्षिण कोरियाबीच दीर्घकालीन सहकार्यका लागि सबै क्षेत्रको सहभागिता आवश्यक रहेको धारणा राखे ।

कार्यक्रममा कोरियन एसोसियसन इन नेपाल, इपिएससम्बन्धी प्रतिनिधि, विभिन्न व्यवसायी, सामाजिक अभियन्ता तथा सञ्चारकर्मीहरूको उल्लेखनीय सहभागिता रहेको थियो ।