यूरोपको कोरोना इपिसेन्टरमा संक्रमण घट्दै, रुस बन्दैछ नयाँ हटस्पट

काठमाडौं, वैशाख २२ः केही हप्ता अघिसम्म कोरोना भाइरस संक्रमणको केन्द्रविन्दुका रुपमा रहेका युरोपेली देशहरुमा कोरोना संक्रमणका कारण हुने मृत्युदरमा निकै कमी आएको छ ।

मृत्युदरमा कमी आएसँगै ती देशहरुले लकडाउन खुकुलो बनाउने योजना बनाएका छन् । भाइरसको संक्रमणका कारण सबैभन्दा बढी प्रभावित इटाली, स्पेन र फ्रान्समा दैनिक मृत्युदर दुई महिना यताकै कम भएको छ ।

फ्रान्समा दैनिक मृत्युदर १३५ जनामा झरेको छ । यसैगरी स्पेनमा १६४ जनाको मृत्यु भएको छ भने इटालीमा १७४ जनाको मृत्यु भएको छ । मार्च महिनाको सुरुवाती दिनमा दैनिक एक हजार माथिको संख्यामा मानवीय क्षति व्यहोरेका यी मुलुकहरुको यो दर निकै कम हो ।

युरोपमा कोरोनाको इपिसेन्टर मानिएका यी मुलुकमा संक्रमण र मृत्युदरमा कमी आएपनि रुस भने कोरोनाको हटस्पट बनेको छ । रुसमा एकै दिनमा १० हजारभन्दा बढीमा संक्रमण पुष्टि भएको छ ।

संक्रमण धेरै भएपनि अन्य देशको तुलनामा रुसमा कोरोनाका कारण हुने मृत्युदर भने कम रहेको छ । रुसमा हालसम्म १ हजार २ सय ८० जनाको मृत्यु भएको छ । आइतबार एकैदिन त्यहाँ ५८ जनाको मृत्यु भएको थियो ।

विश्वमा २१० मुलुकमा फैलिएको कोरोना संक्रमणबाट संयुक्त राज्य अमेरिका सबैभन्दा बढी प्रभावित छ । अमेरिकामा ६५ हजारभन्दा बढी मानिसको कोरोना संक्रमणका कारण मृत्यु भइसकेको छ भने संक्रमितको संख्या पनि ११ लाख ५७ हजारभन्दा बढी रहेको छ । विश्वभर २ लाख ४७ हजारभन्दा बढीको कोरोना संक्रमणका कारण मृत्यु भइसकेको छ भने संक्रमितको संख्या पनि ३५ लाख भन्दा बढी पुगेको छ ।-