instanewsdesk | प्रकाशित मिति: २०८२ बैशाख २४, बुधबार ०७:२१इस्लामाबाद — पाकिस्तान र भारतबीच बुधबार बिहान १ बजेतिरबाट सुरु भएको सैन्य तनाव चर्किएको छ। पाकिस्तानका अधिकारीहरूका अनुसार, भारतले “अपरेशन सिन्दूर” अन्तर्गत कोटली, बहावलपुर, मुरिद्के, बाग र मुजफ्फराबादमा हवाई आक्रमण गरेपछि पाकिस्तानले जवाफी कारबाही गर्दै पाँच वटा भारतीय लडाकु विमान खसालेको दाबी गरेको छ।
पाकिस्तानी सूचना मन्त्री अत्ताउल्लाह तारडले बिहान २:४५ बजे दुई भारतीय विमान खसालिएको पुष्टि गरे। तेस्रो विमान बिहान ३:४२ बजे पाकिस्तान टेलिभिजन (PTV) मार्फत पुष्टि गरिएको थियो। यो राफाल लडाकु विमान अवन्तीपुराबाट दक्षिण–पश्चिमतिर १७ नटिकल माइलको दूरीमा खसालिएको बताइएको छ। चौथो र पाँचौं विमान खसालिएको जानकारी बिहान ५ बजेपछि रक्षा तथा सूचना मन्त्रालयले सार्वजनिक गरे।
पाकिस्तानी सेनाको वक्तव्य अनुसार, भारतका केही सुरक्षा पोस्ट तथा एक ब्रिगेड मुख्यालयलाई समेत ध्वस्त बनाइएको छ। घटनामा आठ जना पाकिस्तानीको मृत्यु भएको र ३५ जना घाइते भएको जनाइएको छ। केही मस्जिदहरू पनि आक्रमणको चपेटामा परेका छन्।
सैन्य गतिविधिको चपेटामा परेपछि पाकिस्तानका सबै इनबाउन्ड र आउटबाउन्ड उडानहरू कराँचीमा मोडिएको र थुप्रै उडानहरू रोकिएको जनाइएको छ।
यस घटनापछि पाकिस्तानको राष्ट्रिय सुरक्षा समितिको आकस्मिक बैठक बिहान १० बजेका लागि बोलाइएको छ। पाकिस्तानका रक्षा मन्त्री ख्वाजा आसिफले ब्लूमबर्ग टिभीलाई दिएको अन्तर्वार्तामा पाँच भारतीय विमानसहित कैयौं मानवविहीन विमान (ड्रोन) पनि खसालिएको र नियन्त्रण रेखा नजिक भारतीय चेकपोस्टहरू ध्वस्त बनाइएको बताएका छन्।
