रास्वपा नेता भन्छन्—‘अब देश बन्छ’, युवा भन्छन्—‘त्यतिन्जेल विदेश जान्छौँ!’

तीन महिनामा वैदेशिक रोजगारीमा जाने बढे, २ लाख नाघे

असोजमा मात्रै ७३ हजारभन्दा बढीले लिए अन्तिम श्रम स्वीकृति, यूएई प्रमुख गन्तव्य

काठमाडौं । चालु आर्थिक वर्ष २०८३/८४ को पहिलो तीन महिनामा वैदेशिक रोजगारीमा जाने नेपालीको संख्या २ लाख ४ हजार नाघेको छ। वैदेशिक रोजगार विभागका अनुसार साउनदेखि असोजसम्म २ लाख ४ हजार २०८ जनाले वैदेशिक रोजगारीका लागि श्रम स्वीकृति लिएका छन्।

गत आर्थिक वर्ष २०८२/८३ को सोही अवधिमा २ लाख ७१६ जनाले श्रम स्वीकृति लिएका थिए। यस आधारमा गत वर्षको तुलनामा चालु आर्थिक वर्षको पहिलो तीन महिनामा वैदेशिक रोजगारीमा जानेको संख्या १.७१ प्रतिशतले बढेको छ।

महिनागत विवरणअनुसार चालु आर्थिक वर्षको साउनमा ७० हजार ४४१ र भदौमा ६० हजार २ जनाले श्रम स्वीकृति लिएका थिए। असोजमा भने यो संख्या बढेर ७३ हजार ७६५ पुगेको छ। गत आर्थिक वर्षको साउनमा ६८ हजार ११०, भदौमा ६७ हजार ९७२ र असोजमा ६४ हजार ६३४ जनाले श्रम स्वीकृति लिएका थिए।

गत वर्षको तुलनामा साउन र असोजमा श्रम स्वीकृति लिनेको संख्या बढेको छ भने भदौमा घटेको छ। असोजमा मात्रै गत वर्षको सोही महिनाको तुलनामा १४.१ प्रतिशतले बढी नेपाली वैदेशिक रोजगारीमा गएका छन्।

असोजमा वैदेशिक रोजगारीका लागि सबैभन्दा बढी नेपालीले संयुक्त अरब इमिरेट्स (यूएई) जान श्रम स्वीकृति लिएका छन्। विभागको तथ्यांकअनुसार उक्त महिनामा यूएईका लागि २३ हजार ८९९ जनाले अन्तिम श्रम स्वीकृति पाएका छन्। यो कुल स्वीकृतिको करिब ३२.४ प्रतिशत हो।

त्यस्तै, कतारका लागि १४ हजार ८७, साउदी अरेबियाका लागि ८ हजार ३६६, कुवेतका लागि ८ हजार ३०८ र मलेसियाका लागि ६ हजार ३६ जनाले श्रम स्वीकृति लिएका छन्। यी पाँच मुलुकमा जाने कामदारको संख्या असोजको कुल स्वीकृतिको करिब ८२ प्रतिशत छ।

यसले नेपाली श्रमिकको वैदेशिक रोजगारी खाडी मुलुक र मलेसियामा केन्द्रित रहेको देखाउँछ। यूएई, कतार, साउदी अरेबिया र कुवेत नेपाली कामदारका प्रमुख गन्तव्यका रूपमा रहेका छन्।

सीपका आधारमा असोजमा श्रम स्वीकृति लिनेमा दक्ष कामदारको हिस्सा सबैभन्दा बढी छ। विभागका अनुसार ४० हजार ७०० दक्ष कामदारले स्वीकृति लिएका छन्। यो कुल संख्याको ५५.२ प्रतिशत हो।

त्यस्तै, २० हजार २२८ अदक्ष कामदारले स्वीकृति लिएका छन्। यो कुल संख्याको २७.४ प्रतिशत हो। अर्धदक्ष कामदारको संख्या १२ हजार ३४२ छ। व्यावसायिक श्रेणीका ४१५ र उच्च दक्ष श्रेणीका ८० जनाले स्वीकृति लिएका छन्।

तथ्यांकमा दक्ष कामदारको हिस्सा ठूलो देखिए पनि अदक्ष श्रमिकको संख्या पनि उल्लेख्य छ। श्रम स्वीकृतिमा उल्लेख गरिएको सीपको वर्गीकरणले मात्रै कामदारको वास्तविक दक्षता, पारिश्रमिक र रोजगारीको गुणस्तर भने पुष्टि गर्दैन।

जिल्लागत विवरणअनुसार असोजमा धनुषाबाट सबैभन्दा बढी ३ हजार ३२६ जनाले वैदेशिक रोजगारीका लागि श्रम स्वीकृति लिएका छन्। सिराहाबाट २ हजार ७२३, मोरङबाट २ हजार ५७८, महोत्तरीबाट २ हजार ५३९ र रुपन्देहीबाट २ हजार ४७४ जनाले स्वीकृति लिएका छन्।

सबैभन्दा बढी श्रम स्वीकृति लिने जिल्लाको सूचीमा मधेश र तराई क्षेत्रका जिल्लाको उपस्थिति उल्लेख्य छ। यसले वैदेशिक रोजगारीमा जाने श्रमिकको स्रोतका रूपमा यी क्षेत्रको महत्त्व देखाउँछ।

असोजमा ८४८ वैदेशिक रोजगार व्यवसायी संस्थामार्फत श्रमिक पठाउने प्रक्रिया अघि बढेको विभागको विवरणमा उल्लेख छ। तीमध्ये अल स्किल्स इन्टरनेसनल ह्युमन रिसोर्स प्रालिमार्फत ५२५, प्याराडाइज इन्टरनेसनल प्रालिमार्फत ४३१ र मोभिरा रिक्रुटमेन्ट कन्सल्टेन्सी सर्भिसेज प्रालिमार्फत ३२४ जनाले श्रम स्वीकृति लिएका छन्।