instanewsdesk | प्रकाशित मिति: २०८२ असार १३, शुक्रबार ११:१०तीन वर्षअघि मिर्चैयाको बतहा पुल नजिकै ग्लोबल आइएमई बैंकका कर्मचारी र सुरक्षाकर्मीमाथि भएको नौ लाख रुपैयाँको सशस्त्र लुटपाट घटनामा संलग्न एक अभियुक्त अन्ततः प्रहरीको फन्दामा परेका छन्।
पक्राउ पर्ने व्यक्ति हुन्—उदयपुर त्रियुगा नगरपालिका–१२ का ३० वर्षीय सुजेन्द्र लोहनी।
उनलाई सिरहा नगरपालिका–१७ स्थित सीमावर्ती क्षेत्र खैरटोकाबाट पक्राउ गरिएको जिल्ला प्रहरी कार्यालय सिरहाका प्रवक्ता प्रहरी नायब उपरीक्षक वीरेन्द्रकुमार पासवानले जानकारी दिए।
२०७९ साल फागुन १० गते मिर्चैया नगरपालिका–३, बतहा पुलछेउ भएको उक्त लुटपाट योजनामा लोहनी चार जनाको समूहसहित संलग्न थिए। ग्लोबल आइएमई बैंक, मिर्चैया शाखाबाट रकम लिएर आउँदै गरेका कर्मचारी र सुरक्षामा खटिएका प्रहरीलाई लखेट्दै ती समूहले पिस्तोल देखाएर आतंक मच्चाएका थिए।
नम्बर नखुलेका मोटरसाइकल चढेर आएका लुटेराहरूले कल्याणपुर इलाका प्रहरीमा कार्यरत जवान निकेश खवासलाई हतियार देखाई कुटपिट गरे र बैंक कर्मचारीसँग रहेको नौ लाख रुपैयाँ लुटेर फरार भएका थिए ।
घटनापछि भारतमा लुकेर बसेका लोहनी हालै नेपाल फर्किएका थिए। त्यसैबेला सुराकीको आधारमा सिरहाको खैरटोकाबाट पक्राउ गरिएको प्रहरीले जनाएको छ। उनलाई जिल्ला अदालत सिरहामा पेश गरी आवश्यक कानुनी प्रक्रिया अघि बढाइएको छ।
