नेपाली विद्यार्थीलाई दूर्व्यवहार गर्ने सुरक्षा कर्मचारी तथा अधिकारीमाथि केआईआईटीले गर्यो कारवाही

भारतको ओडिशा राज्यस्थित कालिंगा इन्स्टिच्युट अफ इन्डस्ट्रियल टेक्नोलोजी (केआईआईटी) मा नेपाली विद्यार्थीहरूमाथि भएको दुर्व्यवहारपछि, विश्वविद्यालयले दुई सुरक्षा कर्मचारीलाई बर्खास्त गरेको छ। साथै, दुई वरिष्ठ होस्टल अधिकारी र अन्तर्राष्ट्रिय सम्बन्ध कार्यालयका एक वरिष्ठ प्रशासनिक अधिकारीलाई अनुसन्धानका लागि निलम्बित गरिएको छ।

बुटवलकी बी.टेक तेस्रो वर्षकी छात्रा प्रकृति लम्सालको शंकास्पद निधनपछि, नेपाली विद्यार्थीहरूले विरोध प्रदर्शन गरेका थिए। यस क्रममा, केही विद्यार्थीहरूलाई रातारात होस्टलबाट निकालिएको थियो, जसले नेपाल र भारतमा व्यापक आलोचना निम्त्यायो।

विश्वविद्यालयले जारी गरेको विज्ञप्तिमा, उक्त घटनाप्रति गहिरो दुःख व्यक्त गर्दै, सम्बन्धित कर्मचारीहरूलाई कारबाही गरिएको उल्लेख छ। साथै, नेपाली विद्यार्थीहरूलाई क्याम्पसमा पुनः स्वागत गर्नका लागि २४ सै घण्टा सञ्चालनमा रहेको नियन्त्रण कक्ष स्थापना गरिएको छ।

प्रारम्भिक चरणमा, विश्वविद्यालय प्रशासनले नेपाली विद्यार्थीहरूको विरोधलाई कानूनी उल्लंघनको रूपमा व्याख्या गरेको थियो। तथापि, पछिल्लो विज्ञप्तिमा, कर्मचारीहरूको अनुचित व्यवहारप्रति क्षमा याचना गर्दै, विद्यार्थीहरूको सुरक्षा र कल्याणलाई सर्वोच्च प्राथमिकता दिने प्रतिबद्धता व्यक्त गरिएको छ।