प्रकृतिका बुबा उडिसामा, भन्छन्–‘ न्याय नपाई जादैनौँ’

भारतको उडिसास्थित कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालयमा अध्ययनरत प्रकृति लम्सालको फागुन ४ गते अपराह्न शंकास्पद मृत्यु भएको थियो। घटनाको जानकारी पाएपछि त्यहाँ पुगेका उनका पिता सुनिल लम्सालले छोरीलाई मानसिक यातना र भावनात्मक ब्ल्याकमेलिङ गरी आत्महत्या गर्न बाध्य पारिएको बताएका छन्। उनका अनुसार, विश्वविद्यालयका अधिकारीहरूले समन्वय गरिरहेका भए पनि आधिकारिक रूपमा कुनै जानकारी दिएका छैनन्। प्रकृतिका भाइ पनि सोही विश्वविद्यालयमा अध्ययनरत छन् र उनले परिवारलाई घटनाबारे जानकारी गराएका थिए, तर मृत्युको कुरा भने बताएका थिएनन्। प्रहरीले मानसिक यातना दिई आत्महत्या गर्न बाध्य पार्ने एक जनालाई पक्राउ गरेको छ। भारतीय कानुनअनुसार आत्महत्या दुरुत्साहन गर्नेलाई १० वर्षसम्मको जेल सजाय हुनसक्छ। सुनिलले प्रहरी प्रशासनले सहयोग गरे पनि विश्वविद्यालयले कुनै सहयोग नगरेको बताएका छन्। उनको एकमात्र माग न्याय पाउनु रहेको छ। बुटवलकी प्रकृति नेपालमा प्लस टू विज्ञान अध्ययनपछि थप अध्ययनका लागि भारत गएकी थिइन् र बी टेक सीएससी तेस्रो वर्षमा अध्ययनरत थिइन्। घटनापछि कलेज प्रशासनले अन्य नेपाली विद्यार्थीहरूलाई पनि दुर्व्यवहार गरी नेपाल फर्काइरहेको छ। सरकारले यस घटनाबारे कूटनीतिक रूपमा कुरा गरिरहेको जनाएको छ।