ग्लुमी डेज आर गन : होटल इन्डसट्रीमा बूम

काठमाडौं : पर्यटन क्षेत्रले गति लिँदै गर्दा नेपाली होटल उद्योगको आर्थिक फड्को पनि स्पष्ट देखिन थालेको छ। लकडाउनको मारबाट उत्रिएको होटल तथा पर्यटन समूह अहिले नाफाको नयाँ उचाइमा पुगेको छ।

चालु आर्थिक वर्षको दोस्रो त्रैमाससम्म होटल्स तथा पर्यटन समूहका ६ वटा कम्पनीले ३ अर्ब ९ करोड ३५ लाख रुपैयाँभन्दा धेरैको व्यापार गरेका छन्, जसमा कुल नाफा ४८ करोड ३६ लाख रुपैयाँ छ। सिटी होटल बाहेक सबै कम्पनीहरू नाफामा छन्, जसले समग्र उद्योगको सुधार संकेत गर्छ।

तर, सिटी होटल भने अझै पनि घाटामा संघर्षरत छ। गत वर्षको तुलनामा नोक्सानी घटे पनि यो कम्पनीले ६ महिनामा १० करोड ४९ लाख रुपैयाँ घाटा बेहोर्‍यो। गत वर्ष यस अवधिमा ११ करोड ७९ लाख नाफा कमाएको कम्पनीको आम्दानी यसपटक २५ करोड ७१ लाखमा सीमित भयो। वित्तीय खर्च घट्दै जाँदा नोक्सानी केही कम भए पनि कम्पनीलाई अझै पुनरुत्थानको खाँचो छ।

सोल्टी होटल्सको वर्चस्व, तारागाउँको मजबुत उपस्थिति

सोल्टी होटल्स नेपाली होटल बजारको बादशाह सावित भएको छ। यो कम्पनीले ६ महिनामा ३० करोड १७ लाख रुपैयाँ नाफा कमाएको छ, जुन गत वर्षको तुलनामा ३ करोड ८६ लाख रुपैयाँ बढी हो। आम्दानी पनि १ अर्ब ५ करोडबाट बढेर १ अर्ब २१ करोड पुगेको छ।

तारागाउँ रिजेन्सी पनि स्थिर गतिमा अघि बढिरहेको छ। कम्पनीले १८ करोड ६७ लाख रुपैयाँ नाफा आर्जन गर्दै आफूलाई दोस्रो स्थानमा राख्न सफल भयो। आम्दानी ६३ करोड ८५ लाखबाट बढेर ६९ करोड ४८ लाख पुगेको छ।

यता, ओरियन्टल होटल्सले भने २ करोड ८८ लाख रुपैयाँ नाफा कमाएको छ, जुन गत वर्षको तुलनामा घटेको हो। कम्पनीको आम्दानी ५६ करोड १ लाखबाट घटेर ४९ करोड १७ लाख पुगेको कारण नाफामा गिरावट देखिएको छ।

कालिन्चोक दर्शन र चन्द्रागिरी हिल्सले क्रमशः ४७ लाख ४६ हजार र ६ करोड ६४ लाख रुपैयाँ नाफा कमाएका छन्, जसले आन्तरिक पर्यटनको महत्त्व बढ्दै गएको संकेत गर्छ।

जगेडा कोषमा ओरियन्टल अगाडि, सिटी होटल अझै ऋणात्मक

होटल कम्पनीहरूको जगेडा कोष हेर्दा ओरियन्टल होटल्स सबैभन्दा अघि देखिन्छ, जसको कोषमा २ अर्ब ७७ करोड रुपैयाँ छ। सोल्टीले १ अर्ब ४९ करोड र तारागाउँले १ अर्ब १० करोड जम्मा गरेका छन्।

तर, सिटी होटल र चन्द्रागिरी हिल्स भने ऋणात्मक जगेडा कोषका साथ संघर्ष गरिरहेका छन्।

प्रतिसेयर आम्दानी र नेटवर्थमा को अगाडि?

प्रतिसेयर आम्दानीतर्फ तारागाउँ रिजेन्सीले ९.५२ रुपैयाँसहित अग्रस्थान लिएको छ। चन्द्रागिरी हिल्सको ४.३३, सोल्टीको ३.२५ रुपैयाँ प्रतिसेयर आम्दानी देखिएको छ।

यता, प्रतिसेयर नेटवर्थमा ओरियन्टल होटल्स ३४६.१२ रुपैयाँका साथ अगाडि छ, जबकि तारागाउँको १५६.४८ रुपैयाँ र कालिन्चोक दर्शनको १०१.४८ रुपैयाँ प्रतिसेयर नेटवर्थ छ।

चुक्ता पुँजीमा तारागाउँ अगाडि

चुक्ता पुँजीतर्फ तारागाउँ १ अर्ब ९६ करोड २१ लाख रुपैयाँसहित अग्रस्थानमा छ। सिटी होटलको १ अर्ब ६७ करोड, चन्द्रागिरीको १ अर्ब ५३ करोड ४० लाख, र ओरियन्टल होटल्सको १ अर्ब १२ करोड ८० लाख रुपैयाँ चुक्ता पुँजी देखिएको छ।

नेपालको होटल उद्योगले नयाँ उचाइ लिँदै गर्दा, सशक्त कम्पनीहरू मजबुत बन्दै गएका छन्, भने केही अझै संघर्षरत छन्। पर्यटन प्रवद्र्धनसँगै यी कम्पनीहरूको भविष्य कस्तो रहने हो, त्यो हेर्न बाँकी छ।