instanewsdesk | प्रकाशित मिति: २०८३ कार्तिक ११, मंगलवार ११:१४दसैँमा अन्नपूर्ण पदमार्गमा पर्यटक दोब्बर, १४ दिनमा ५ हजार ३८४ पुगे
लमजुङ । यस वर्षको दसैँ अवधिमा अन्नपूर्ण चक्रीय पदमार्गमा विदेशी पर्यटकको आगमन उल्लेख्य बढेको छ। घटस्थापनादेखि कोजाग्रत पूर्णिमासम्म अर्थात् असोज २५ देखि कात्तिक ८ गतेसम्म ५ हजार ३८४ विदेशी पर्यटकले यो पदमार्गको भ्रमण गरेका छन्। गत वर्ष सोही अवधिमा २ हजार ७५७ पर्यटक आएका थिए।
अन्नपूर्ण संरक्षण क्षेत्र आयोजना (एक्याप) को धारापानीस्थित पर्यटक जाँच तथा सूचना केन्द्रका प्रमुख भूपेन्द्र गुरुङका अनुसार गत वर्षको तुलनामा यस वर्ष २ हजार ६२७ पर्यटक बढी आएका हुन्। यस वर्षको आगमन गत वर्षको सोही अवधिको तुलनामा झन्डै दोब्बर हो।
पर्यटक आगमन बढ्नुको एउटा कारण मनास्लु क्षेत्रको पदमार्गमा बाढीपहिरोले पुर्याएको क्षति रहेको गुरुङले बताएका छन्। मनास्लु पदमार्गमा आवागमन प्रभावित भएपछि त्यहाँ जाने केही पर्यटक अन्नपूर्ण पदमार्गतर्फ आएका उनको भनाइ छ। यसबाहेक अनुकूल मौसम र पछिल्लो समय घुमफिर गर्ने संस्कृति बढ्दै जानुले पनि पर्यटक आगमनमा सहयोग गरेको उनले बताए।
केन्द्रको तथ्यांकअनुसार दसैँ अवधिमा अन्नपूर्ण पदमार्गमा आएका पर्यटकमध्ये ३ हजार २८८ पुरुष र २ हजार ९४ महिला छन्। अन्य दुई जना छन्। सार्क राष्ट्रबाट ६०९ र गैरसार्क राष्ट्रबाट ४ हजार ७७५ पर्यटक आएका छन्।
देशगत रूपमा सबैभन्दा बढी पर्यटक भारतबाट आएका छन्। भारतबाट ६०६ पर्यटक आउँदा जर्मनीबाट ४३८, इजरायलबाट ४१८, फ्रान्सबाट ३६४ र संयुक्त राज्य अमेरिकाबाट ३५२ पर्यटक आएका छन्।
लमजुङको बेँसीसहरबाट सुरु हुने अन्नपूर्ण चक्रीय पदमार्ग मनाङ हुँदै थोराङ्ला भञ्ज्याङ पार गरेर मुस्ताङसम्म पुग्छ। हिमाली दृश्य, प्राकृतिक सौन्दर्य, परम्परागत बस्ती र स्थानीय संस्कृतिको अवलोकन गर्न पाइने भएकाले यो पदमार्ग विदेशी पर्यटकमाझ लोकप्रिय छ।
दसैँ अवधिमा पर्यटक आगमन बढ्दा पदमार्ग आसपासका होटल, रेस्टुरेन्ट, यातायात तथा अन्य पर्यटन व्यवसायमा पनि आर्थिक गतिविधि बढ्ने अपेक्षा गर्न सकिन्छ। तर, पर्यटक आगमन वृद्धिमा मौसम, मनास्लु क्षेत्रको अवरोध र घुमफिरको बढ्दो रुचिमध्ये कुन कारणको प्रभाव कति रह्यो भन्ने छुट्टै तथ्यांक भने उपलब्ध छैन।
