चीनसँगको सीमा जोड्ने सिमकोट–हिल्सा सडकखण्डमा जमेको हिउँ पन्छाउन सुरु

सुर्खेत । हुम्लाको चीनसँगको सीमा जोड्ने सिमकोट–हिल्सा सडकखण्डमा जमेको हिउँ पन्छाउन सुरु गरिएको छ । नाम्खा गाउँपालिका–५ स्थित नारा लेक क्षेत्रमा जेसीबी परिचालन गरेर हिउँ हटाउन थालिएको हो। असोज १० गतेदेखि हिमपातका कारण अवरुद्ध सडक दुईदेखि तीन दिनभित्र सञ्चालनयोग्य बनाउने लक्ष्य राखिएको छ ।

कर्णाली करिडोरअन्तर्गत यारी–नारा लेक हुँदै हिल्सासम्मको सडकमा करिब १० किलोमिटर क्षेत्रमा हिउँ जमेको छ। लामो समयदेखि यातायात सेवा अवरुद्ध हुँदा हिल्सामा रहेका स्थानीय, होटल व्यवसायी तथा सरकारी कार्यालयका कर्मचारी प्रभावित भएका छन्। सडक खुलाउन हिउँ पन्छाउने काम सुरु भएपछि चीनको ताक्लाकोट क्षेत्रमा रहेका हुम्लाका नागरिकलाई समेत दसैँ–तिहारका बेला घर फर्किन सहज हुने अपेक्षा गरिएको छ ।

हिल्सा–सिमकोट सडक योजनाका प्रमुख बेलबहादुर नेपालीका अनुसार नारा लेक क्षेत्रको ठाडो ढुङ्गामा जमेको हिउँ पन्छाउने काम बुधबार बिहानदेखि सुरु गरिएको हो। अहिले यारी क्षेत्रबाट नारा लेकतर्फ हिउँ हटाउने काम भइरहेको छ। नारा लेक पार गरेर हिल्सातर्फ जाने सडकमा जमेको हिउँ पन्छाउने कामलाई पनि तीव्रता दिइने उनले बताए।

उनका अनुसार सडकको केही भागमा करिब तीन फिट हिउँ जमेको छ। नारा लेकको हिल्सातर्फ पर्ने ओरालोको खाल्डो क्षेत्रमा भने करिब चार मिटर हिउँ थुप्रिएको छ। अत्यधिक हिउँ जमेकाले उक्त क्षेत्रमा हिउँ हटाउन बढी समय लाग्ने उनको भनाइ छ।

‘अहिले यारीबाट नारा लेकतर्फ हिउँ पन्छाउने काम सुरु भएको छ। हिउँ धेरै जमेकाले सडक सञ्चालनयोग्य बनाउन दुईदेखि तीन दिन लाग्ने अनुमान गरेका छौँ,’ उनले भने।

चार हजार ६७० मिटर उचाइमा हिउँको अवरोध

समुद्री सतहदेखि चार हजार ६७० मिटर उचाइमा रहेको नारा लेकमा यसपटक भारी हिमपात भएपछि सडक यातायात प्रभावित भएको हो। उच्च हिमाली क्षेत्रमा पर्ने उक्त सडकखण्डमा हिउँ बाक्लो गरी जम्दा सवारीसाधन आवतजावत गर्न नसकेको हो।

सडक योजनाका प्रमुख नेपालीका अनुसार हिउँ पन्छाउने कामलाई निरन्तरता दिन जेसीबीका लागि आवश्यक थप इन्धनको व्यवस्था गरिएको छ। बुधबार सिमकोटबाट इन्धन नारा लेकतर्फ पठाइएको उनले जानकारी दिए।

जेसीबीमार्फत बिहानदेखि साँझ साढे ५ बजेसम्म हिउँ हटाउने काम गरिनेछ। मौसमले साथ दिए र काममा थप अवरोध नआए दुईदेखि तीन दिनभित्र सडक सञ्चालनयोग्य बनाउने योजनाको लक्ष्य छ।

नारा लेकमा हिउँ जम्दा सिमकोटदेखि हिल्सासम्मको सडक सम्पर्क विच्छेद भएको छ। हिल्सा चीनको ताक्लाकोट जाने प्रमुख नाका भएकाले यो सडक अवरुद्ध हुँदा सीमावर्ती क्षेत्रमा आवतजावत गर्ने नागरिक, व्यापारी र व्यवसायीलाई समेत समस्या भएको छ।

हिल्सामा रोकिए स्थानीय र व्यवसायी

हिउँका कारण यातायात अवरुद्ध भएपछि हिल्सामा रहेका स्थानीयवासी तथा व्यवसायीको दैनिकी प्रभावित भएको छ। हिल्सास्थित मानसरोवर होटलकी सञ्चालक पेमा लामाले सडकमा जमेको हिउँ पन्छाउने काम सुरु भएकोमा खुसी व्यक्त गरिन्। उनले हिउँ हटाएपछि चाँडै यातायात सेवा सञ्चालनमा आउने विश्वास व्यक्त गरिन्।

हाल हिल्सामा सशस्त्र प्रहरी बल, नेपाल प्रहरी, यारी नाका भन्सार कार्यालय र अध्यागमन कार्यालयका कर्मचारीसँगै होटल व्यवसायी तथा केही स्थानीय व्यापारी बस्दै आएका छन्। सडक अवरुद्ध हुँदा उनीहरूको आवतजावतमा कठिनाइ भएको छ।

विशेषगरी दसैँ–तिहार नजिकिँदै गर्दा चीनको ताक्लाकोट क्षेत्रमा व्यापार, रोजगारी तथा अन्य कामका लागि पुगेका हुम्लाका नागरिकलाई घर फर्किन सडक खुल्ने प्रतीक्षा छ। सडक सञ्चालनमा आएपछि उनीहरूलाई आवतजावत गर्न सहज हुने अपेक्षा गरिएको छ।

१५ वर्षयताकै असोजमा भारी हिमपात

स्थानीयका अनुसार यस वर्ष हिल्सामा असोज १० गतेदेखि विगत १५ वर्षयताकै पहिलोपटक यति भारी हिमपात भएको हो। विगतका वर्षमा कात्तिक महिनापछि मात्रै यसरी बाक्लो हिउँ पर्ने गरेको भए पनि यस वर्ष मौसममा आएको परिवर्तनका कारण असोजमै हिमपात भएको उनीहरूको भनाइ छ।

असोजमै परेको भारी हिमपातले उच्च हिमाली क्षेत्रमा जनजीवनसँगै यातायात र व्यापार व्यवसायमा समेत असर पारेको छ। हिमपातपछि नारा लेकमा जमेको हिउँ पन्छाउन ढिलाइ हुँदा सिमकोट–हिल्सा सडक लामो समयदेखि अवरुद्ध रहँदै आएको छ।

अहिले नारा लेकमा हिउँ हटाउने काम सुरु भए पनि सिमकोट–हिल्सा सडकखण्डको अर्को उच्च हिमाली क्षेत्र न्यालु लेकमा जमेको हिउँ पन्छाउने काम भने सुरु भएको छैन। त्यसैले नारा लेकको हिउँ हटेपछि मात्रै सम्पूर्ण सडकखण्ड सहज रूपमा सञ्चालनमा आउने अवस्था निश्चित नहुने देखिन्छ।

हेमन्त केसी, नेपाल न्यूज बैंक