तरकारीमा पनि आयात निर्भरता, पूर्वी नाकाबाटै भित्रियो २४ अर्बको कृषिजन्य वस्तु

झापा । पूर्वी नाका काँकरभिट्टाबाट एक वर्षमा २४ अर्ब २६ करोड रुपैयाँभन्दा बढीको कृषिजन्य वस्तु आयात भएको छ। प्लान्ट क्वारेन्टाइन कार्यालय काँकरभिट्टाका अनुसार आर्थिक वर्ष २०८२/८३ मा भारत, चीन, अस्ट्रेलिया र बंगलादेशबाट खाद्यान्न, दलहन, ताजा तरकारी तथा फलफूल गरी उक्त मूल्य बराबरको कृषि वस्तु नेपाल भित्रिएको हो।

कार्यालयका प्रमुख नन्दकिशोर सिंहका अनुसार आयातित कृषि वस्तुमध्ये खाद्यान्न र दलहनको हिस्सा सबैभन्दा ठूलो छ। यसले नेपालमा कृषि उत्पादन बढे पनि खाद्यान्न तथा दालजन्य वस्तुमा आयात निर्भरता कायमै रहेको देखाउँछ।

भारतबाट मात्रै २४ करोड २३ लाख रुपैयाँको चामल र १८ करोड ८३ लाख रुपैयाँको कोदो आयात भएको छ। त्यस्तै, अस्ट्रेलिया र भारतबाट १८ करोड २७ लाख रुपैयाँ बराबरको १ हजार ९९६ मेट्रिकटन चना नेपाल भित्रिएको छ।

अस्ट्रेलियाबाट मात्रै १० करोड ८८ लाख रुपैयाँ बराबरको ७९६ मेट्रिकटन मासको दाल आयात भएको कार्यालयको तथ्यांक छ।

काँकरभिट्टा नाकाबाट ठूलो परिमाणमा ताजा तरकारीसमेत आयात भएको छ। भारतबाट एक वर्षमा १४ करोड ३९ लाख रुपैयाँको गोलभेडा, ७ करोड ९० लाख रुपैयाँको काँक्रा र ३ करोड २४ लाख रुपैयाँको खुर्सानी आयात भएको छ।

नेपालका बजारमा वर्षभरि उत्पादन हुने तरकारीमै पनि सीमापार निर्भरता देखिनुले स्वदेशी उत्पादन र बजार व्यवस्थापनमा चुनौती रहेको देखाउँछ।

फलफूलतर्फ भारत र चीनबाट २९ करोड ५९ लाख रुपैयाँको स्याउ आयात भएको छ। त्यस्तै, भारतबाट मात्रै १४ करोड २४ लाख रुपैयाँको तरबुजा भित्रिएको छ।

भारत र चीनबाट स्याउसँगै भुइँकटहर, तरबुजा र नास्पाती पनि ठूलो परिमाणमा आयात भएको कार्यालयले जनाएको छ।

काँकरभिट्टा नाकाबाट मात्रै एक वर्षमा २४ अर्ब रुपैयाँभन्दा बढीको कृषि वस्तु आयात हुनुले नेपालको कृषि बजारमा उत्पादन र आपूर्तिबीचको अन्तर तथा आयात निर्भरता अझै ठूलो रहेको देखाएको छ। स्वदेशी उत्पादन बढाउन सके यस्ता वस्तुको आयात प्रतिस्थापन गर्दै ठूलो रकम देशभित्रै राख्न सकिने सम्भावना देखिन्छ।