instanewsdesk | प्रकाशित मिति: २०८२ चैत्र २४, मंगलवार १५:००काठमाडौं । नेपाल राष्ट्र बैंकको डेपुटी गभर्नरमा कार्यकारी निर्देशक किरण पण्डित नियुक्त भएका छन् ।
मंगलबार बसेको मन्त्रिपरिषद् बैठकले राष्ट्र बैंकमा रिक्त रहेका दुई डेपुटी गभर्नरमध्ये एक पदमा पण्डितलाई नियुक्त गर्ने निर्णय गरेको हो ।
विसं २०६२ सालमा बैंकिङ सेवामा प्रवेश गरेका पण्डितलाई अर्थ मन्त्रालयको प्रस्तावमा उक्त जिम्मेवारी दिइएको हो ।
भुक्तानी प्रणाली विभागका प्रमुख रहिसकेका पण्डितले २०६२ सालदेखि बैंकिङ सेवामा यात्रा सुरु गरेका हुन्। करिब दुई दशक लामो अनुभवका क्रममा उनले बैंकका अधिकांश महत्वपूर्ण तथा प्राविधिक विभागहरूमा नेतृत्वदायी भूमिका निर्वाह गरिसकेका छन्।
उनको अनुभव विशेषगरी बैंक तथा वित्तीय संस्था नियमन विभाग, भुक्तानी प्रणाली विभाग र सुपरिवेक्षण विभागमा केन्द्रित छ—जसलाई केन्द्रीय बैंकको मेरुदण्डका रूपमा लिइन्छ। यी विभागमार्फत वित्तीय स्थायित्व, अनुशासन र प्रणालीगत सुदृढीकरणमा उनले उल्लेखनीय योगदान दिएका छन्।
वैदेशिक मुद्रा व्यवस्थापन, भुक्तानी प्रणाली र वित्तीय समावेशिताजस्ता क्षेत्रमा उनको सक्रिय भूमिकाले उनलाई आधुनिक बैंकिङ प्रणाली र प्रविधिमा दख्खल भएको अधिकारीका रूपमा स्थापित गरेको छ।
