सुदूरपश्चिम लगानी सम्मेलनअघि मुख्यमन्त्री शाह– एफ्एनसीसीआईकाअध्यक्ष ढकाल भेटवार्ता

कैलाली — सुदूरपश्चिम प्रदेशका मुख्यमन्त्री कमलबहादुर शाह र नेपाल उद्योग वाणिज्य महासङ्घका अध्यक्ष चन्द्र ढकालबीच आज मुख्यमन्त्री निवासमा भेटवार्ता भएको छ।
भेटका क्रममा अध्यक्ष ढकालले सुदूरपश्चिम प्रदेश लगानी सम्मेलनका लागि महासङ्घले तयार पारेको “सुदूरपश्चिम प्रदेशमा लगानी सम्भावना, अवसर तथा चुनौती–स्थिति पत्र, २०८१” मुख्यमन्त्री शाहलाई बुझाए।

स्थिति पत्र ग्रहणपछि मुख्यमन्त्री शाहले सुदूरपश्चिममा विशाल लगानी सम्भावना रहेको उल्लेख गर्दै प्रदेश सरकारले अनुकुल लगानी वातावरण निर्माणलाई अत्यन्त प्राथमिकता दिएको बताए। उनले निजी क्षेत्रलाई विश्वासमा लिएर अगाडि बढ्ने प्रतिबद्धता व्यक्त गर्दै, “सुदूरपश्चिमको कर्णाली–चिसापानी क्षेत्रमा ५ अर्ब रूपैयाँ लगानीमा केवलकार परियोजना सञ्चालन गरी प्रदेशमा लगानीमैत्री वातावरण निर्माण गरेकोमा अध्यक्ष ढकाललाई धन्यवाद व्यक्त गरे ।

अध्यक्ष ढकालले सुदूरपश्चिममा पर्यटन, कृषि, जडीबुटी, धार्मिक तथा जलस्रोत क्षेत्रमा अपार सम्भावना रहेको बताउँदै प्रदेशमा अर्को ठूलो लगानी आकर्षित गर्न महासंघ प्रतिबद्ध रहेको जानकारी दिए। उनले चिसापानीमा ५ अर्ब लगानीमा निर्माण भइरहेको केवलकार परियोजना प्रदेशको आर्थिक विकासमा टेवा पुग्ने विश्वास व्यक्त गरे।

सिमानासँग नजिक रहेको भौगोलिक अवस्थाका कारण सुदूरपश्चिममा अन्तर्राष्ट्रिय क्षेत्रमा समेत लगानीको अवसर बढिरहेको उल्लेख गर्दै ढकालले नेपालमा नकारात्मक धारणा भन्दा पनि सकारात्मक ऊर्जा र लगानीमैत्री सोच आवश्यक भएको बताए।