सरकारका रुग्ण उद्योग निजीकरणतर्फ, मूल्यांकनका लागि परामर्शदाता फाइनल

काठमाडौ‌ँ । अर्थ मन्त्रालयले सरकार स्वामित्वका चार रुग्ण उद्योगको निजीकरण प्रक्रियाअन्तर्गत सम्पत्ति मूल्यांकनका लागि तीन कम्पनीको प्राविधिक प्रस्ताव स्वीकृत गरेको छ। साउन २० मा आह्वान गरिएको बोलपत्रमा प्राप्त प्रस्तावहरूमध्ये यी कम्पनीहरू योग्य ठहरिएका हुन्। छनोटमा परेका कम्पनीहरूको आर्थिक प्रस्ताव आगामी मंसिर २१ गते खोलिनेछ।

गत बजेटमार्फत सरकारले यी चार उद्योगको सम्पत्ति व्यवस्थापन गरी औपचारिक रूपमा खारेज गर्ने घोषणा गरेको थियो। त्यसअघि, वैशाख १५ गते बसेको मन्त्रिपरिषद्को बैठकले सात वटा रुग्ण उद्योगको सम्पत्ति ‘व्यवस्थापन’ गर्ने निर्णय लिएको थियो। सोही नीतिअनुसार अर्थ मन्त्रालयले पहिलो चरणमा चार उद्योगको मूल्यांकन प्रक्रिया शुरू गरेको हो।

मूल्यांकनका लागि अगाडि सारिएका उद्योगहरूमा जनकपुर चुरोट कारखाना, बुटवल धागो कारखाना, नेपाल मेटल कम्पनी र नेपाल ओरियन्ट म्याग्नेसाइट रहेका छन्।

प्राविधिक प्रस्तावको आधारमा:

एस एण्ड एस–पीजेपीएन जेभीए चारै उद्योग मूल्यांकनका लागि योग्य ठहरिएको छ।

नेपाल ओरियन्ट म्याग्नेसाइट र बुटवल धागो कारखानाका लागि यही कम्पनी एकलरूपमा सफल भएको छ।

नेपाल मेटल कम्पनीका लागि जिन एण्ड एसोसिएट्स पनि योग्य बनेको छ।

जनकपुर चुरोट कारखानाका लागि एस. सुवेदी एण्ड एसोसिएट्स योग्य ठहरिएको छ।

यससँगै, अर्थ मन्त्रालयले चार रुग्ण उद्योगको सम्पत्ति मूल्यांकनका लागि कम्पनीहरूको औपचारिक सर्टलिस्ट सार्वजनिक गरेको छ।