instanewsdesk | प्रकाशित मिति: २०८२ श्रावण २३, शुक्रबार ०८:५२काठमाडौं । सिद्धार्थ बैंक लिमिटेडले आर्थिक वर्ष २०८१/८२ मा ३ अर्ब ३९ करोड रुपैयाँ खुद नाफा आर्जन गर्दै अघिल्लो वर्षको तुलनामा २०.२४ प्रतिशत वृद्धि हासिल गरेको छ। अघिल्लो वर्ष बैंकको खुद नाफा ३ अर्ब ८ करोड रुपैयाँ थियो।
समीक्षा वर्षमा बैंकको प्रमुख आय सूचकांकमा उल्लेखनीय वृद्धि भएको छ। खुद ब्याज आम्दानी ६.४३ प्रतिशत बढेर ८ अर्ब ४४ करोड रुपैयाँ पुगेको छ भने खुद शुल्क तथा कमिसन आम्दानी १५ प्रतिशतले बढेर १ अर्ब ६४ करोड रुपैयाँ भएको छ। कुल सञ्चालन आम्दानी ११.८२ प्रतिशत बढ्दै ११ अर्ब १६ करोड रुपैयाँमा पुगेको छ।
गत वर्ष बैंकको चुक्ता पुँजी १४ अर्ब ९ करोड रुपैयाँ र जगेडा कोष १६ अर्ब ९० करोड रुपैयाँ रहेको छ। निक्षेप संकलन १६.१६ प्रतिशत वृद्धि भई २ खर्ब ८० अर्ब रुपैयाँ पुगेको छ भने कर्जा लगानी ९.७६ प्रतिशत बढेर २ खर्ब १४ अर्ब रुपैयाँमा पुगेको छ।
नाफा वृद्धि संगै बैंकको प्रतिसेयर आम्दानी (EPS) २४.१० रुपैयाँ पुगेको छ। मूल्य-आम्दानी अनुपात (P/E Ratio) १५.९३ गुणा र प्रतिसेयर नेटवर्थ २१९.९७ रुपैयाँ रहेको छ। यस अवधिमा बैंकको खराब कर्जा (NPL) २.६२ प्रतिशतमा सीमित रहेको छ।
विशेषतः, वितरणयोग्य नाफा २२० प्रतिशतले बढेर १ अर्ब ८६ करोड रुपैयाँ पुगेको छ, जसको आधारमा बैंकको लाभांश वितरण क्षमता १३.२२ प्रतिशत रहेको छ। अघिल्लो वर्ष वितरणयोग्य नाफा ५८ करोड रुपैयाँ मात्र थियो।
