आठ सय वर्ष पुरानो नोत्र दाममा भीषण आगलागी

पेरिस : फ्रान्सको राजधानी पेरिसमा अवस्थित आठ सय वर्षभन्दा पुरानो ऐतिहासिक नर्थदाम क्याथेद्रालमा लागेको भीषण आगो मंगलवर बिहान नियन्त्रणमा आएको छ।

आगलागीबाट क्याथेद्रालको शिखर र छाना भत्किएर भुइँमा झरेको छ। फ्रान्सेली संस्कृति र इतिहासको धरोहरको रूपमा रहेको अमूल्य सम्पदा आगलागीबाट लगभग नष्ट भएको छ।

आगोको लप्काले गिर्जाघरलाई छोपेको थियो भने धुवाँको मुस्लो आकाशतर्फ उठेको देखिन्थ्यो। अग्निनियन्त्रकले यस भयानक आगलागीबाट बहुमूल्य सामग्री जोगाउने भरमग्दुर प्रयत्न गरेका थिए।

आगोले ८५० वर्षअघि निर्मित युनेस्को विश्व सम्पदा सूचीमा सूचीकृत गिर्जाघरको छाना पूर्णतः नष्ट बनाएको छ। विशिष्ट शैलीको यो छाना र शिखरलाई आगोको लप्काले छोपेको थियो। यस आगोले दुबै सम्पदालाई हेर्दाहेर्दै आकाशमा विलीन बनायो।

फ्रान्सका राष्ट्रपति एम्यानुएल माक्रोँले मुलुकको महत्वपूर्ण स्थलका रूपमा रहेको गिर्जाघर पुनर्निर्माण गर्ने प्रण गरेका छन्।