भूकम्प पछिको पुनर्निर्माणमा मात्रै १४ लाख २० हजारले पाए रोजगारी

सेजनको प्रतिवेदन अनुसार अहिलेपनि साढे ५ लाख जनशक्ति आवास पुनर्निर्माणको काममा संलग्न रहेको देखाएको छ । यसले १० करोड कार्यदिन बराबरको रोजगारी सिर्जना भएको प्रतिवेदनमा उल्लेख छ ।

कूल जनसंख्याको १४ प्रतिशत र कूल पुरुष जनसंख्याको २० प्रतिशत जनशक्ति अहिलेपनि पुनर्निर्माणको क्षेत्रमा कार्यरत रहेका छन् । प्रतिवेदन अनुसार भूकम्पले क्षति पु-याएका ६१ प्रतिशत नीजि घरहरुको पुनर्निर्माण सम्पन्न भएको छ ।

सरकारी भवन र विद्यालयतर्फ ७० प्रतिशत काम सकिएको छ । प्रतिवेदनले स्वास्थ्य संस्था, सुरक्षा निकाय भवनहरु र सांस्कृतिक सम्पदाहरुको पुनर्निर्माणमा ध्यान दिन सुझाव दिएको छ ।

राष्ट्रिय पुनर्निर्माण प्राधिकरणका प्रबन्ध निर्देशक सुशिल ज्ञवालीले अहिलेको कार्यरत जनशक्तिलाई भोली कसरी व्यवस्थापन गर्ने भन्ने चुनौती थपिएको बताउनुभयो ।

सेजनको अध्ययन प्रतिवेदनले भूकम्पपछिको पुनर्निर्माणले नेपालको कुल ग्राहस्थ उत्पादनको वृद्धिदर औषतमा ४ दशमलव ५ प्रतिशत योगदान दिएको देखाएको छ ।