शरद् ऋतुमा हिमाल आरोहणबाट २८ करोड रोयल्टी, मनास्लुबाट मात्रै २२ करोड

७१ देशका १ हजार ९८ आरोहीले लिए अनुमति, मनास्लु चढ्न ५०० जनाले अनुमति लिँदा आमादब्लम दोस्रो रोजाइमा

काठमाडौं । सन् २०२६ को शरद् ऋतुमा नेपालका हिमाल आरोहणका लागि ७१ देशका एक हजार ९८ आरोहीले अनुमति लिएका छन्। पर्यटन विभागका अनुसार ३१ हिमाल आरोहणका लागि १३० टोलीका आरोहीले अनुमति लिएका हुन्। उनीहरूबाट सरकारले २८ करोड २४ लाख १४ हजार ५६ रुपैयाँ रोयल्टी सङ्कलन गरेको छ।

विभागका सूचना अधिकारी सुरज घिमिरेका अनुसार अनुमति लिनेमा ८३३ पुरुष र २६५ महिला छन्। आरोहण अनुमतिबापत १८ लाख ५४ हजार ९५९ अमेरिकी डलर रोयल्टी सङ्कलन भएको विभागले जनाएको छ।

यस सिजनमा आरोहीको सबैभन्दा बढी आकर्षण मनास्लु हिमालतर्फ देखिएको छ। आठ हजार १६३ मिटर अग्लो मनास्लु आरोहणका लागि ४३ टोलीका ५०० जनाले अनुमति लिएका छन्। तीमध्ये ३७३ पुरुष र १२७ महिला छन्। मनास्लु आरोहण अनुमतिबाट मात्रै २२ करोड ५८ लाख ५७ हजार १८९ रुपैयाँ रोयल्टी सङ्कलन भएको छ। यो कुल रोयल्टीको ठूलो हिस्सा हो।

मनास्लुपछि आमादब्लम हिमाल आरोहणमा धेरै आरोहीले अनुमति लिएका छन्। आमादब्लम आरोहणका लागि १६ टोलीका १७८ जनाले अनुमति लिएका छन्। उनीहरूबाट दुई करोड ७३ लाख १५ हजार ५०० रुपैयाँ रोयल्टी सङ्कलन भएको छ।

त्यस्तै, हिम्लुङ हिमाल आरोहणका लागि नौ टोलीका ९४ जनाले अनुमति लिएका छन्। उनीहरूबाट ५७ लाख ८८ हजार ९६० रुपैयाँ रोयल्टी प्राप्त भएको छ। धौलागिरि–१ आरोहणका लागि छ टोलीका ३७ जनाले अनुमति लिँदा ८४ लाख ७३ हजार ६५० रुपैयाँ रोयल्टी सङ्कलन भएको छ।

मकालु हिमाल आरोहणका लागि भने एक टोलीका तीन जनाले अनुमति लिएका छन्। उनीहरूबाट छ लाख ८८ हजार ५० रुपैयाँ राजस्व प्राप्त भएको विभागले जनाएको छ।

यस सिजनमा पुथा हिउँचुली, डाङ्गा हिउँचुली, बरुणत्से, गङ्गापूर्णा पश्चिम (लाङचेनेल), थोरोङ पिक, नोर्बु खाङ, अन्नपूर्ण–४, चाम्लाङ, लमजुङ हिमाल, पुमोरी, सारिबुङ, थापा पिक (धाम्पुस), पोखर खाङ, अर्दाङ र पेरीलगायत हिमाल आरोहणका लागि पनि अनुमति जारी गरिएको छ।

आरोहण अनुमति लिने विदेशीमध्ये सबैभन्दा धेरै चीनका १३२ जना छन्। त्यसपछि रसियाका ९६, अमेरिकाका ९४, फ्रान्सका ९३ र बेलायतका ७४ जना छन्। यसबाहेक पोल्यान्डका २९, स्विजरल्यान्डका २८, इटलीका २८, जापानका २८, नेपालका २६, भारतका २२ र स्पेनका २१ जनाले अनुमति लिएका छन्।

शरद् ऋतु नेपालमा हिमाल आरोहणको प्रमुख सिजनमध्ये एक हो। यस अवधिमा विभिन्न हिमाल आरोहणका लागि आउने विदेशी आरोहीबाट प्राप्त रोयल्टी पर्यटन क्षेत्रको आम्दानीको महत्त्वपूर्ण स्रोतका रूपमा रहन्छ। यस वर्षको अनुमति विवरणले मनास्लुमा आरोहीको उच्च आकर्षण र त्यसबाट प्राप्त हुने रोयल्टीको ठूलो हिस्सा देखाएको छ।