instaeconomicdesk | प्रकाशित मिति: २०८३ आश्विन २०, मंगलवार ०६:२३काठमाडौं । अर्थमन्त्री डा. स्वर्णिम वाग्ले र विश्व बैंक समूहका अध्यक्ष अजय बाङ्गाबीच नेपालमा बाढीबाट क्षतिग्रस्त पूर्वाधारको पुनर्निर्माण, आर्थिक सुधार तथा बीमा र सामाजिक संरक्षणका लागि करिब १ अर्ब अमेरिकी डलर बराबरको स्रोत परिचालन गर्ने विषयमा छलफल भएको छ।
विश्व बैंकका अध्यक्ष बाङ्गाको निमन्त्रणामा अमेरिकाको वासिङ्टन डीसी पुगेका अर्थमन्त्री वाग्लेले सोमबार विश्व बैंक समूहका अध्यक्षसँग उच्चस्तरीय द्विपक्षीय भेटवार्ता गरेका हुन्। भेटमा नेपालका तत्कालीन आवश्यकता तथा दीर्घकालीन आर्थिक सुधारका विषयमा छलफल भएको अर्थ मन्त्रालयले जनाएको छ।
भेटका क्रममा अर्थमन्त्री वाग्लेले हालै रसुवाको भोटेकोशी नदीमा आएको बाढीबाट क्षतिग्रस्त भौतिक तथा आर्थिक पूर्वाधारको पुनर्निर्माणलाई प्राथमिकतामा राख्दै स्रोत परिचालनका विषयमा छलफल गरेका थिए। बाढीबाट क्षतिग्रस्त सडक, पुल, ऊर्जा तथा अन्य पूर्वाधारको पुनर्निर्माणसँगै प्रभावित क्षेत्रको आर्थिक पुनरुत्थानका लागि आवश्यक सहयोगबारे पनि छलफल भएको जनाइएको छ।
नेपालले पछिल्लो समय भोगेको विपद्को क्षति सम्बोधनसँगै समग्र अर्थतन्त्रमा सुधार, बीमा प्रणालीको विस्तार र सामाजिक संरक्षणलाई प्रभावकारी बनाउने विषयलाई समेत अर्थमन्त्री वाग्लेले विश्व बैंक अध्यक्षसमक्ष राखेका थिए।
विश्व बैंकका अध्यक्ष बाङ्गाले नेपालमा बाढी तथा विपद्बाट भएको क्षतिप्रति दुःख व्यक्त गर्दै पुनर्निर्माणका क्षेत्रमा विश्व बैंकले उल्लेख्य सहयोग गर्ने प्रतिबद्धता जनाएका छन्। उनले विपद्पछिको पुनर्निर्माणमा नेपाललाई आवश्यक सहयोग उपलब्ध गराउने बताएका हुन्।
भेटमा अध्यक्ष बाङ्गाले नेपाल सरकारले नीतिगत तथा संस्थागत सुधारका लागि अघि बढाएका कदमको प्रशंसा गर्दै पूर्वाधारमा लगानी विस्तार र देशभित्रै रोजगारी सिर्जना गर्नुपर्ने आवश्यकतामा जोड दिएका थिए।
नेपालको आर्थिक विकासका लागि पूर्वाधारमा लगानी बढाउनुपर्ने र त्यसबाट स्वदेशमै रोजगारीका अवसर विस्तार गर्नुपर्नेमा विश्व बैंकले जोड दिएको हो। उत्पादन तथा लगानीको वातावरण सुधार गर्दै आर्थिक गतिविधि विस्तार गर्नुपर्ने विषयमा पनि छलफल भएको जनाइएको छ।
विश्व बैंकका अध्यक्ष बाङ्गाले एसियाली विकास बैंक (एडीबी), अन्तर्राष्ट्रिय वित्त निगम (आईएफसी) लगायतका विकास साझेदारसँग समन्वय गरेर नेपालका प्राथमिकताका क्षेत्रमा संयुक्त लगानी विस्तार गर्न विश्व बैंकले नयाँ पहल गर्ने जानकारी दिएका छन्।
नेपालका लागि विश्व बैंकका राष्ट्रिय निर्देशक डेभिड सिस्लेनका अनुसार पछिल्लो तीन दशकमा विश्व बैंक समूहका अध्यक्ष र नेपालका अर्थमन्त्रीबीच भएको यो पहिलो प्रत्यक्ष द्विपक्षीय भेटवार्ता हो।
भेटवार्तामा विश्व बैंकका उपाध्यक्षद्वय जहानस जट र जुनेद अहमदलगायत उच्चपदस्थ अधिकारीहरूको पनि सहभागिता थियो।
अर्थमन्त्री वाग्ले विश्व बैंक अध्यक्ष बाङ्गाको निमन्त्रणामा प्रतिनिधिमण्डलको नेतृत्व गर्दै अमेरिका पुगेका हुन्। उनको भ्रमणका क्रममा नेपालमा बाढीपछिको पुनर्निर्माण, आर्थिक सुधार, निजी तथा सार्वजनिक लगानी विस्तार र विकास साझेदारबाट थप स्रोत परिचालनका विषयमा छलफललाई प्राथमिकता दिइएको छ।
नेपालले विपद्पछि पुनर्निर्माणका लागि ठूलो स्रोत आवश्यक पर्ने अवस्थामा विश्व बैंकसहित बहुपक्षीय विकास साझेदारबाट सहुलियतपूर्ण तथा अन्य वित्तीय स्रोत परिचालन गर्ने प्रयास गरिरहेको छ। यस भेटवार्ताले बाढीपछिको पुनर्निर्माणसँगै दीर्घकालीन आर्थिक सुधार र पूर्वाधार लगानीका लागि थप स्रोत जुटाउने आधार तयार गर्ने अपेक्षा गरिएको छ।
