instakhabar | प्रकाशित मिति: २०८३ आश्विन १९, सोमबार १७:०१काठमाडौं । नेपाली कांग्रेसका उपसभापति विश्वप्रकाश शर्माले पार्टीभित्र र समग्र नेपाली राजनीतिमा देखिएको लोकतान्त्रिक संस्कृतिको क्षय रोक्दै युगानुकूल राजनीतिक रूपान्तरण आवश्यक रहेको बताएका छन् ।
कांग्रेसको १५औँ महाधिवेशनमा प्रस्तुत गरेको प्रतिवेदनमा शर्माले राजनीतिक प्रणालीसँगै राजनीतिक दल, नेतृत्व र कार्यकर्ताको संस्कार तथा व्यवहारमा पनि सुधार आवश्यक रहेको उल्लेख गरेका छन्।
उनले कांग्रेसले आफ्ना कमजोरीप्रति आत्मालोचना गर्दै लोकतान्त्रिक संस्कृतिको पुनर्जागरणका लागि पहल गर्नुपर्ने प्रस्ताव गरेका छन् ।
शर्माले लोकतान्त्रिक प्रणालीलाई निर्वाचनमा सीमित गर्न नहुने उल्लेख गर्दै नागरिकको प्रश्न, सहभागिता, जवाफदेहिता, विधिको शासन र संस्थाको सम्मानलाई लोकतन्त्रको महत्वपूर्ण आधारका रूपमा प्रस्तुत गरेका छन् ।
प्रतिवेदनमा उनले कांग्रेसले व्यक्तिको गल्तीको भार संस्थामाथि नबोकाउने स्पष्ट नीति लिनुपर्ने बताएका छन् ।
कानुन उल्लंघनका घटनामा पार्टीका नेता तथा कार्यकर्ताले व्यक्तिगत रूपमा कानुनी प्रक्रियाको सामना गर्नुपर्ने, तर आरोपकै आधारमा निर्दोष व्यक्तिलाई फसाउन नहुने र दोषीलाई राजनीतिक संरक्षण दिन नहुने उनको प्रस्ताव छ ।
शर्माले नेतृत्वलाई ‘जमेको पोखरी’ नभई ‘बगिरहने नदी’ जस्तो बनाउनुपर्ने बताएका छन् । निश्चित समय र औचित्यपछि नेतृत्वले सम्मानजनक रूपमा बहिर्गमनको बाटो रोज्नुपर्ने उनको प्रस्ताव छ ।
उनले पटकपटक एउटै नेतृत्व दोहोरिँदा नागरिकमा वितृष्णा बढ्ने र नेतृत्वका विगतका सकारात्मक योगदानसमेत ओझेलमा पर्ने उल्लेख गरेका छन् । कांग्रेसले आगामी दिनमा नेतृत्वलाई ताजगीपूर्ण र गतिशील बनाउने तथा त्यसलाई विधान, संविधान र लोकतान्त्रिक संस्कारबाट सुरक्षित गर्ने नीति लिनुपर्ने उनले बताएका छन् ।
शर्माले पार्टीभित्र नेतृत्व चयनमा व्यक्तिको प्रभाव, पहुँच र सम्बन्धभन्दा विचार, क्षमता र योजनालाई प्राथमिकता दिनुपर्ने बताएका छन् ।
प्रतिवेदनमा शर्माले पछिल्लो ३५ वर्षमा नेपालमा कुनै प्रगति नभएको भन्ने भाष्य गलत रहेको दाबी गरेका छन् ।
भोटेकोसी बाढीमा क्षति भएका सडक, पुल तथा जलविद्युत् आयोजनाको उदाहरण दिँदै उनले तीमध्ये अधिकांश संरचना पछिल्लो ३५ वर्षमा निर्माण भएको उल्लेख गरेका छन् । यस अवधिमा मुलुकले सशस्त्र द्वन्द्व, राजाको प्रत्यक्ष शासन, भूकम्प र कोरोना महामारीजस्ता चुनौती सामना गरे पनि विभिन्न क्षेत्रमा उपलब्धि हासिल भएको उनको भनाइ छ ।
उनले राजनीतिक बहसमा उपलब्धि र कमजोरी दुवैलाई तथ्यका आधारमा मूल्यांकन गर्नुपर्ने बताएका छन् ।
शर्माले लोकतान्त्रिक राजनीतिमा पारिवारिक वा राजनीतिक विरासतभन्दा विचारलाई प्राथमिकता दिनुपर्ने बताएका छन् ।
प्रतिवेदनमा उनले बीपी कोइरालाको विचारलाई पछिल्लो पुस्तासँग जोडेर अघि बढाउनुपर्ने उल्लेख गर्दै कांग्रेसले नयाँ पुस्तालाई पार्टीको विचार र लोकतान्त्रिक संस्कृतिसँग जोड्नुपर्ने प्रस्ताव गरेका छन्।
उनले राजनीतिक नेतृत्वको मूल्यांकन वंश वा विरासतका आधारमा नभई विचार, योगदान र कार्यसम्पादनका आधारमा हुनुपर्ने बताएका छन् ।
शर्माले कांग्रेसभित्र परम्परागत गुटको अन्त्य गर्नुको अर्थ नयाँ गुट निर्माण गर्नु नभएको बताएका छन् । गुटको विकल्प विचार, नीति, योजना र दृष्टिकोण हुनुपर्ने उनको प्रस्ताव छ ।
