Impairment Cost Crash Lifts Kamana Seva Bank Profit by 33.5%, एक वर्षमै कमायो ८९.४२ करोड रुपैयाँ

काठमाडौं । कामना सेवा विकास बैंक लिमिटेडले गत आर्थिक वर्ष २०८२/८३ मा ८९ करोड ४१ लाख ७८ हजार रुपैयाँ खुद मुनाफा आर्जन गरेको छ। यो अघिल्लो आर्थिक वर्षको तुलनामा ३३.५१ प्रतिशत बढी हो।

बैंकले शनिबार सार्वजनिक गरेको चौथो त्रैमाससम्मको अपरिष्कृत वित्तीय विवरणअनुसार अघिल्लो आर्थिक वर्ष २०८१/८२ को सोही अवधिमा बैंकले ६६ करोड ९७ लाख ५१ हजार रुपैयाँ खुद मुनाफा कमाएको थियो।

नाफासँगै बैंकको प्रतिशेयर आम्दानी (EPS) पनि उल्लेख्य रूपमा बढेको छ। अघिल्लो वर्षको १९.०८ रुपैयाँ रहेको EPS ३.६७ रुपैयाँ बढेर २२.७५ रुपैयाँ पुगेको छ।

बैंकको खुद ब्याज आम्दानी (Net Interest Income) ३.९८ प्रतिशतले वृद्धि भई २ अर्ब ४१ करोड ८ लाख रुपैयाँ पुगेको छ। अघिल्लो वर्ष यही अवधिमा यस्तो आम्दानी २ अर्ब ३१ करोड ८५ लाख रुपैयाँ थियो।

गत आर्थिक वर्षमा बैंकले ५ अर्ब १९ करोड रुपैयाँ ब्याज आम्दानी गरेको भने २ अर्ब ७८ करोड रुपैयाँ ब्याज खर्च गरेको छ। ब्याज आम्दानीमा उल्लेख्य वृद्धि नभए पनि ब्याज खर्चमा आएको कमीका कारण खुद ब्याज आम्दानी बढ्न सफल भएको देखिन्छ।

यद्यपि बैंकको स्प्रेड दर (Net Interest Spread) भने ४.२७ प्रतिशतबाट घटेर ३.९८ प्रतिशतमा सीमित भएको छ।

बैंकको सञ्चालन मुनाफा पनि ३२.८७ प्रतिशतले बढेर १ अर्ब ३८ करोड २५ लाख रुपैयाँ पुगेको छ। अघिल्लो वर्ष यही अवधिमा सञ्चालन मुनाफा १ अर्ब ४ करोड ४ लाख रुपैयाँ रहेको थियो।

यस वर्ष बैंकको नाफा बढ्नुको प्रमुख कारणमध्ये एक इम्पेरमेन्ट चार्जमा आएको उल्लेख्य गिरावट हो। बैंकले अघिल्लो वर्ष ४१ करोड ८१ लाख रुपैयाँ इम्पेरमेन्ट चार्ज छुट्याएकोमा समीक्षा अवधिमा यो घटेर १३ करोड ६५ लाख रुपैयाँमा सीमित भएको छ।

यद्यपि, खराब कर्जा (NPL) भने केही बढेको छ। अघिल्लो आर्थिक वर्षको ३.४९ प्रतिशत रहेको NPL समीक्षा अवधिमा ३.७७ प्रतिशत पुगेको छ।

असार मसान्तसम्म बैंकको वितरणयोग्य मुनाफा ६० करोड ११ लाख रुपैयाँ रहेको छ। यस आधारमा बैंकको लाभांश क्षमता करिब १५.१६ प्रतिशत पुगेको देखिन्छ।

बैंकको चुक्ता पुँजी ४ अर्ब २१ करोड १९ लाख रुपैयाँ रहेको छ भने जगेडा कोषमा २ अर्ब १४ करोड १३ लाख रुपैयाँ सञ्चित छ। समीक्षा अवधिसम्म बैंकले ६६ अर्ब ७४ करोड रुपैयाँ निक्षेप संकलन गरी ५५ अर्ब ८० करोड रुपैयाँ कर्जा प्रवाह गरेको छ।