नेपालको शिक्षामा ‘लर्निङ क्राइसिस’ देखियो : डा. महाश्रम शर्मा

काठमाडौं । राष्ट्रिय परीक्षा बोर्डका निवर्तमान अध्यक्ष डा. महाश्रम शर्माले पछिल्लो समय शिक्षा क्षेत्रमा ‘लर्निङ क्राइसिस’ देखिएकाले यसलाई तत्काल सुधार गर्नुपर्नेमा बताएका छन् ।

विगत तीन दशकमा नेपालको शिक्षा क्षेत्रले पहुँच र समावेशिताका हिसाबले ठूलो फड्को मारे पनि सिकाइ उपलब्धिमा भने अझै चुनौती रहेको उनको भनाइ छ ।

केन्द्रबिन्दु अनलाइन मिडिया प्रालिको आयोजनामा मंगलबार ललितपुरमा भएको ‘चौथो केन्द्रबिन्दु एजुकेसन एक्सिलेन्स अवार्ड २०८३’मा कि–नोट स्पिकरका रुपमा शर्माले भने,‘विगत तीन दशकको शिक्षालाई पछाडि फर्केर हेर्ने हो भने पहिलो चरणमा विद्यालयमा विद्यार्थीको पहुँच पु¥याउन ठूलो मिहिनेत गर्नुपरेको थियो । दोस्रो चरणमा हामीले यसलाई समावेशी बनायौँ र अहिले तेस्रो चरणमा सिकाइ र गुणस्तरको चरणमा आइपुगेका छौँ ।’

एक समय विद्यालयमा विद्यार्थी ल्याउनै गाह्रो हुने स्थिति रहेको उल्लेख गर्दै उनले अहिले अन्तर्राष्ट्रिय संस्था युनेस्कोले समेत नेपालमा विद्यार्थीको पहुँच उच्च रहेको स्वीकार गरिसकेको बताए ।

यो सफलता राज्यको लगानी, विकास साझेदार र सरोकारवाला सबैको योगदानका कारण सम्भव भएको उनको भनाइ थियो ।

हालैको माध्यमिक शिक्षा परीक्षाको नतिजा ६० प्रतिशतको हाराहारीमा पुगेको चर्चा गर्दै उनले यसलाई शतप्रतिशत पु¥याउन अझै धेरै काम गर्न बाँकी रहेको बताए ।

विगत तीन दशकदेखि नेपालमा सामुदायिक कि निजी विद्यालय राम्रो भन्ने बहस भावनात्मक र राजनीतिक रूपमा मात्रै चलिरहेको भन्दै उनले यसको व्यावहारिक समाधान खोज्नुपर्ने बताए ।

नेपालको शिक्षा क्षेत्रमा निजी क्षेत्रले पु¥याएको योगदान महत्त्वपूर्ण रहेको भन्दै उनले निजी विद्यालयहरूले गुणस्तर, नवप्रवर्तन र अभिभावकलाई विद्यालय छान्ने अवसर प्रदान गरेको उल्लेख गरे । निजी क्षेत्रले देशका लागि आवश्यक मानव पुँजी निर्माण गर्नुका साथै सार्वजनिक प्रणाली सुधार र स्वस्थ प्रतिस्पर्धाको वातावरण बनाएको उनको विश्लेषण थियो ।