अन्तर्राष्ट्रिय न्यायालयले आज इजरायलविरुद्धको मुद्दामा फैसला सुनाउदै

अन्तर्राष्ट्रिय न्यायालय आईसीजेले इजरायललाई रफाहमा आक्रमण रोक्न आदेश दिन माग गर्दै दक्षिण अफ्रिकाले गरेको आग्रहमाथि आज आफ्नो फैसला सुनाउने भएको छ । इजरायलले गाजामा नरसंहार गरेको आरोप लगाउँदै दक्षिण अफ्रिका यसै वर्षको जनवरीमा हेगस्थित अन्तर्राष्ट्रिय न्यायालयसम्म पुगेको हो । गत हप्ता, दक्षिण अफ्रिकाले गाजा र विशेष गरी रफाहमा प्यालेस्टिनी जनताको अस्तित्व सुनिश्चित गर्न आवश्यक भएको बताएको थियो । अन्तर्राष्ट्रिय न्यायालयका आदेशलाई इजरायलले यसअघि पनि बेवास्ता गर्दै आएकाले यस पटकको आदेश पालना गर्नेमा आशंका छ । राष्ट्रसंघका शीर्ष कानुनी निकायसँग आफ्नो निर्णयहरू लागूगर्ने कुनै तरिका नभएकाले निर्णयलाई बेवास्ता गर्दै आएको हो । बिहीबारमात्रै मध्य गाजामा रहेको जनकल्याण मन्त्रालयको एक स्टोरमा इजरायली सेनाले गोलाबारी गर्दा १२ प्यालेस्टाइनीको मृत्यु हुनुका साथै ३० भन्दा बढी घाइते भएका छन् । गत वर्षको अक्टोबर ७ मा हमासले दक्षिणी इजरायलमा अचानक आक्रमण गरी १२ सय जनाको मृत्यु भएको थियो । हमासले २ सय ५० भन्दा बढीलाई बन्धक बनाएपछि इजरायलले गाजामा निरन्तर आक्रमण गरिरहेको छ । आक्रमणमा अहिलेसम्म ३५ हजारभन्दा बढी प्यालेष्टिनीको मृत्यु भैसकेको छ ।